paimane mein wo zahr nahin ghol rahe the

paimāne meñ vo zahr nahīñ ghol rahe the

mere liye maiḳhāne kā dar khol rahe the

maiñ dair meñ chup duur se muñh dekh rahā thā

kis tarah bure bol ye but bol rahe the

karte the vo baiThe hue nāḳhun se judā gosht

kahne ko mire dil kī girah khol rahe the

sayyād ne kab nāvak-e-bedād lagāyā

ham uḌne ko jab shāḳh se par tol rahe the

ai aañkh dur-e-ashk vahī naza.a meñ kaam aa.e

ban kar tire dāman meñ jo anmol rahe the

ham baiThe the kis tarah tah-e-shāḳh fasurda

gul hañste the murġhān-e-chaman bol rahe the

shoḳhī se qayāmat ko vo pasañg banā kar

ham kitne haiñ bātoñ meñ hameñ tol rahe the

the sub.h ko vo sāġhar-e-jam dast-e-gadā meñ

ālūda mai-e-shab ko jo kashkol rahe the

kuchh chup se haiñ ab hashr meñ aane se kisī ke

baḌh baḌh ke 'riyāz' aaj bahut bol rahe the

paimane mein wo zahr nahin ghol rahe the

mere liye maiKHane ka dar khol rahe the

main dair mein chup dur se munh dekh raha tha

kis tarah bure bol ye but bol rahe the

karte the wo baiThe hue naKHun se juda gosht

kahne ko mere dil ki girah khol rahe the

sayyaad ne kab nawak-e-bedad lagaya

hum uDne ko jab shaKH se par tol rahe the

ai aankh dur-e-ashk wahi naza mein kaam aae

ban kar tere daman mein jo anmol rahe the

hum baiThe the kis tarah tah-e-shaKH fasurda

gul hanste the murghan-e-chaman bol rahe the

shoKHi se qayamat ko wo pasang bana kar

hum kitne hain baaton mein hamein tol rahe the

the subh ko wo saghar-e-jam dast-e-gada mein

aaluda mai-e-shab ko jo kashkol rahe the

kuchh chup se hain ab hashr mein aane se kisi ke

baDh baDh ke 'riyaz' aaj bahut bol rahe the