pairaw-e-maslak-e-taslim-o-raza hote hain

pairav-e-maslak-e-taslīm-o-razā hote haiñ

ham terī rāh-e-mohabbat meñ fanā hote haiñ

sharm kar sharm ki ai jazba-e-tāsīr-e-vafā

tere hāthoñ vo pashīmān-e-jafā hote haiñ

chheḌtī hai mujhe bebāki-e-ḳhvāhish kyā kyā

jab kabhī haath vo pāband-e-hinā hote haiñ

na asar aah meñ kuchh hai na duā meñ tāsīr

tiir ham jitne chalāte haiñ ḳhatā hote haiñ

ahl-e-dil sunte haiñ ik sāz-e-mohabbat kī navā

ham tirī yaad meñ jab naġhma-sarā hote haiñ

lazzat-e-dard na kyuuñ ahl-e-havas par ho harām

ki vo kam-baḳht talabgār-e-davā hote haiñ

kishvar-e-ishq meñ duniyā se nirālā hai rivāj

kaam jo ban na paḌeñ yaañ vo ravā hote haiñ

hech ham samjhe do aalam ko to hairat kyā hai

rutbe ushshāq ke is se bhī sivā hote haiñ

jism hotā hai judā jaan se goyā 'hasrat'

āsmāñ un se chhuḌātā hai judā hote haiñ

pairaw-e-maslak-e-taslim-o-raza hote hain

hum teri rah-e-mohabbat mein fana hote hain

sharm kar sharm ki ai jazba-e-tasir-e-wafa

tere hathon wo pashiman-e-jafa hote hain

chheDti hai mujhe bebaki-e-KHwahish kya kya

jab kabhi hath wo paband-e-hina hote hain

na asar aah mein kuchh hai na dua mein tasir

tir hum jitne chalate hain KHata hote hain

ahl-e-dil sunte hain ek saz-e-mohabbat ki nawa

hum teri yaad mein jab naghma-sara hote hain

lazzat-e-dard na kyun ahl-e-hawas par ho haram

ki wo kam-baKHt talabgar-e-dawa hote hain

kishwar-e-ishq mein duniya se nirala hai riwaj

kaam jo ban na paDen yan wo rawa hote hain

hech hum samjhe do aalam ko to hairat kya hai

rutbe ushshaq ke is se bhi siwa hote hain

jism hota hai juda jaan se goya 'hasrat'

aasman un se chhuData hai juda hote hain