paise hote to tujhe le ke khilaune deta

paise hote to tujhe le ke khilaune detā

varna kyā maiñ mere bachche tujhe rone detā

hoñT par rakhtā hai añgusht-e-shahādat aise

baat merī vo mukammal nahīñ hone detā

hai to muflis vo magar apnī davā.ī se kabhī

ḳharch ahbāb ke paise nahīñ hone detā

aisā karne kī bhī baḳhshī na ijāzat us ne

kam se kam dard to sheroñ meñ samone detā

mere beTe koī chāra hī nahīñ thā varna

apne hisse ke tujhe bojh na Dhone detā

dukh bhī detā hai to detā hai qayāmat ke mujhe

aur mirī aañkh bhī giilī nahīñ hone detā

beTiyoñ kā kabhī ghar-bār na ujḌe 'ġhaznī'

ye vo dukh hai jo nahīñ baap ko sone detā

paise hote to tujhe le ke khilaune deta

warna kya main mere bachche tujhe rone deta

honT par rakhta hai angusht-e-shahadat aise

baat meri wo mukammal nahin hone deta

hai to muflis wo magar apni dawai se kabhi

KHarch ahbab ke paise nahin hone deta

aisa karne ki bhi baKHshi na ijazat us ne

kam se kam dard to sheron mein samone deta

mere beTe koi chaara hi nahin tha warna

apne hisse ke tujhe bojh na Dhone deta

dukh bhi deta hai to deta hai qayamat ke mujhe

aur meri aankh bhi gili nahin hone deta

beTiyon ka kabhi ghar-bar na ujDe 'ghazni'

ye wo dukh hai jo nahin bap ko sone deta