pakDi kisi se jawe nasim aur saba bandhe

pakḌī kisī se jaave nasīm aur sabā bañdhe

maulā kare kuchh apnī bhī ab to havā bañdhe

'āshiq ko boġh-band meñ bāñdhā hai us ne yuuñ

tā ho ke dast-e-buqcha meñ jaise qabā bañdhe

yuuñ duud aah kā mirī gumbad bañdhā hai yaañ

chhat jaise abr-e-tīra kī tahtussamā bañdhe

Tuk 'ālam ai junūñ tū dikhā vo ki jis se saaf

lāhūt kā samāñ mirī āñkhoñ meñ aa bañdhe

sarmā ghulā ke āñkhoñ meñ niklā na kījiye

aisā na ho ki aap pe kuchh tūtiyā bañdhe

qudrat ḳhudā ke dekho ki chorī to ham kareñ

aur ulTe dast-gīr ho duzd-e-hinā bañdhe

aljheḌe meñ phañse the tirī zulf ke so vo

ulTe Tañge asiir hue bārhā bañdhe

'inshā' sad-āfrīñ tire zehn-e-salīm ko

mazmūñ ziyāda is se bhalā aur kyā bañdhe

pakDi kisi se jawe nasim aur saba bandhe

maula kare kuchh apni bhi ab to hawa bandhe

'ashiq ko bogh-band mein bandha hai us ne yun

ta ho ke dast-e-buqcha mein jaise qaba bandhe

yun dud aah ka meri gumbad bandha hai yan

chhat jaise abr-e-tira ki tahtussama bandhe

Tuk 'alam ai junun tu dikha wo ki jis se saf

lahut ka saman meri aankhon mein aa bandhe

sarma ghula ke aankhon mein nikla na kijiye

aisa na ho ki aap pe kuchh tutiya bandhe

qudrat KHuda ke dekho ki chori to hum karen

aur ulTe dast-gir ho duzd-e-hina bandhe

aljheDe mein phanse the teri zulf ke so wo

ulTe Tange asir hue barha bandhe

'insha' sad-afrin tere zehn-e-salim ko

mazmun ziyaada is se bhala aur kya bandhe