pakDi na thi kitab ki ustad ho gae

pakḌī na thī kitāb ki ustād ho ga.e

haath aa ga.ī ġhulail to sayyād ho ga.e

le ham ne khol dī haiñ ye āñkheñ shu.ūr kī

le ham tire fareb se āzād ho ga.e

tū ne ai zindagī jo sikhā.e hameñ sabaq

āsānī se hameñ vo sabaq yaad ho ga.e

duniyā se Dar ga.e jo vo duniyā meñ gum hue

karte rahe jo ishq vo farhād ho ga.e

yādeñ tirī hameñ liye pahuñchī thiiñ jis jagah

ham phir usī jazīre pe ābād ho ga.e

maslūb ho ga.e jinheñ matlab thā ishq se

daulat kī thī talab jinheñ shaddād ho ga.e

ya.anī ki ishq chhoḌ ke sab kuchh kiyā gayā

kyā kyā tarīqe ishq ke ījād ho ga.e

ta.amīr yuuñ hue the ki hairān the mahal

ujḌe bhī yuuñ ki sūrat-e-baġhdād ho ga.e

tum ko bhulā na pā.egī tārīḳh ab kabhī

'āqib' tum ab havāla-e-buniyād ho ga.e

pakDi na thi kitab ki ustad ho gae

hath aa gai ghulail to sayyaad ho gae

le hum ne khol di hain ye aankhen shuur ki

le hum tere fareb se aazad ho gae

tu ne ai zindagi jo sikhae hamein sabaq

aasani se hamein wo sabaq yaad ho gae

duniya se Dar gae jo wo duniya mein gum hue

karte rahe jo ishq wo farhad ho gae

yaaden teri hamein liye pahunchi thin jis jagah

hum phir usi jazire pe aabaad ho gae

maslub ho gae jinhen matlab tha ishq se

daulat ki thi talab jinhen shaddad ho gae

yani ki ishq chhoD ke sab kuchh kiya gaya

kya kya tariqe ishq ke ijad ho gae

tamir yun hue the ki hairan the mahal

ujDe bhi yun ki surat-e-baghdad ho gae

tum ko bhula na paegi tariKH ab kabhi

'aqib' tum ab hawala-e-buniyaad ho gae