پل بھر کا بھروسہ نہیں سامان بہت ہے

پل بھر کا بھروسہ نہیں سامان بہت ہے

یہ سوچ کے دل میرا پریشان بہت ہے

شہرت کی زمانے میں تمنا نہ کرو تم

اخلاق ہی انسان کی پہچان بہت ہے

تم کیسے بھلا پاؤ گے بھائی کی محبت

دیوار اٹھا لینا تو آسان بہت ہے

اڑ جائیں گے اک روز یہ لے کر کے قفس بھی

مظلوم پرندوں میں ابھی جان بہت ہے

جس سمت بھی جاؤ گے تمہیں پیار ملے گا

نفرت کا مرے شہر میں فقدان بہت ہے

تہذیب و ثقافت ہمیں ورثے میں ملی اور

اجداد کا ہم لوگوں پہ احسان بہت ہے

ہر حال میں رکھا ہمیں خوش حال جہاں میں

اللہ کا قمرؔ ہم پہ یہ احسان بہت ہے