pal KHushi ke to kabhi aankh mein pani dega

pal ḳhushī ke to kabhī aañkh meñ paanī degā

vaqt har roz na.ī ek kahānī degā

dil mire chheḌ na tū phir vo purāne qisse

zikr-e-māzī mujhe bas ashk-fishānī degā

peḌ kīkar ke bhī ā.eñge kahīñ rāhoñ meñ

har jagah to vo nahīñ raat kī raanī degā

zindagī ek jagah par hī rukī hai kab se

jaane ab kab vo use aa ke ravānī degā

bas isī aas pe aTkī hai mirī jaan ab tak

koī to rut vo kabhī mujh ko suhānī degā

lauT aa.egā vo mausam hai bharosa ye mujhe

phir mire baaġh ko vo rang-fishānī degā

dil se kahne kī to koshish to zarā kar 'madhuman'

tere alfāz ko phir ḳhud vo ma.ānī degā

pal KHushi ke to kabhi aankh mein pani dega

waqt har roz nai ek kahani dega

dil mere chheD na tu phir wo purane qisse

zikr-e-mazi mujhe bas ashk-fishani dega

peD kikar ke bhi aaenge kahin rahon mein

har jagah to wo nahin raat ki rani dega

zindagi ek jagah par hi ruki hai kab se

jaane ab kab wo use aa ke rawani dega

bas isi aas pe aTki hai meri jaan ab tak

koi to rut wo kabhi mujh ko suhani dega

lauT aaega wo mausam hai bharosa ye mujhe

phir mere bagh ko wo rang-fishani dega

dil se kahne ki to koshish to zara kar 'madhuman'

tere alfaz ko phir KHud wo maani dega