pal rahe hain kitne andeshe dilon ke darmiyan

pal rahe haiñ kitne andeshe diloñ ke darmiyāñ

raat kī parchhā.iyāñ jaise diyoñ ke darmiyāñ

phir kisī ne ek ḳhūñ-ālūd ḳhanjar rakh diyā

ḳhauf ke zulmat-kade meñ dostoñ ke darmiyāñ

kyā sunahrī daur thā ham zard pattoñ kī tarah

dar-ba-dar phirte rahe piilī rutoñ ke darmiyāñ

ai ḳhudā insān kī taqsīm-dar-taqsīm dekh

pārsāoñ devtāoñ qātiloñ ke darmiyāñ

āshtī ke naam par itnī saf-ārā.ī huī

aa ga.ī bārūd kī ḳhush-bū guloñ ke darmiyāñ

merā chehrā ḳhud bhī āshob-e-safar meñ kho gayā

maiñ ye kis ko DhūñDtā huuñ manziloñ ke darmiyāñ

pal rahe hain kitne andeshe dilon ke darmiyan

raat ki parchhaiyan jaise diyon ke darmiyan

phir kisi ne ek KHun-alud KHanjar rakh diya

KHauf ke zulmat-kade mein doston ke darmiyan

kya sunahri daur tha hum zard patton ki tarah

dar-ba-dar phirte rahe pili ruton ke darmiyan

ai KHuda insan ki taqsim-dar-taqsim dekh

parsaon dewtaon qatilon ke darmiyan

aashti ke nam par itni saf-arai hui

aa gai barud ki KHush-bu gulon ke darmiyan

mera chehra KHud bhi aashob-e-safar mein kho gaya

main ye kis ko DhunDta hun manzilon ke darmiyan