palak palak sail-e-gham ayan hai na koi aahaT na koi halchal

palak palak sail-e-ġham 'ayāñ hai na koī aahaT na koī halchal

kasak ye kaisī darūn-e-jāñ hai na koī aahaT na koī halchal

hamārī bastī meñ har taraf inqalāb-e-nau kā 'amal thā jaarī

na jaane ye kaun sā jahāñ hai na koī aahaT na koī halchal

lahū uchhalne kā shor jaise fazā meñ gūñjā kabhī nahīñ thā

ye hukm-e-shahr-e-sitamgarāñ hai na koī aahaT na koī halchal

ho sub.h-e-raushan ki shām-e-rañgīñ kisī meñ koī kashish nahīñ hai

har ek ḳhvāhish dhuāñ dhuāñ hai na koī aahaT na koī halchal

na.e zamāne kī maiñ bashārat kā muntazir huuñ magar abhī tak

hayāt aise ravāñ-davāñ hai na koī aahaT na koī halchal

hujūm-e-saut-o-sadā saḌak par julūs ban kar nikal paḌā hai

samā'atoñ kā ye imtihāñ hai na koī aahaT na koī halchal

maiñ apne andar jahāñ chhupā huuñ koī na pahuñchā vahāñ abhī tak

sukūt har samt be-karāñ hai na koī aahaT na koī halchal

fazā kī raunaq zamīñ kī saj dhaj qalam kī jumbish pe munhasir hai

'ajīb pābandī-e-zabāñ hai na koī aahaT na koī halchal

mire tasavvur kī nīlgūñ jhiil meñ ek taarā jahāñ girā thā

vahāñ ḳhamoshī balā-e-jāñ hai na koī aahaT na koī halchal

baḌhūñ to aage dhueñ ke bādal haTūñ to pīchhe balāoñ ke dil

ye kaisā manzar yahāñ vahāñ hai na koī aahaT na koī halchal

sukūt siine meñ aisā kab thā gumāñ bhī guzre na dhaḌkanoñ kā

ḳhudā hī jaane ki dil kahāñ hai na koī aahaT na koī halchal

palak palak sail-e-gham 'ayan hai na koi aahaT na koi halchal

kasak ye kaisi darun-e-jaan hai na koi aahaT na koi halchal

hamari basti mein har taraf inqalab-e-nau ka 'amal tha jari

na jaane ye kaun sa jahan hai na koi aahaT na koi halchal

lahu uchhalne ka shor jaise faza mein gunja kabhi nahin tha

ye hukm-e-shahr-e-sitamgaran hai na koi aahaT na koi halchal

ho subh-e-raushan ki sham-e-rangin kisi mein koi kashish nahin hai

har ek KHwahish dhuan dhuan hai na koi aahaT na koi halchal

nae zamane ki main bashaarat ka muntazir hun magar abhi tak

hayat aise rawan-dawan hai na koi aahaT na koi halchal

hujum-e-saut-o-sada saDak par julus ban kar nikal paDa hai

sama'aton ka ye imtihan hai na koi aahaT na koi halchal

main apne andar jahan chhupa hun koi na pahuncha wahan abhi tak

sukut har samt be-karan hai na koi aahaT na koi halchal

faza ki raunaq zamin ki saj dhaj qalam ki jumbish pe munhasir hai

'ajib pabandi-e-zaban hai na koi aahaT na koi halchal

mere tasawwur ki nilgun jhil mein ek tara jahan gira tha

wahan KHamoshi bala-e-jaan hai na koi aahaT na koi halchal

baDhun to aage dhuen ke baadal haTun to pichhe balaon ke dil

ye kaisa manzar yahan wahan hai na koi aahaT na koi halchal

sukut sine mein aisa kab tha guman bhi guzre na dhaDkanon ka

KHuda hi jaane ki dil kahan hai na koi aahaT na koi halchal