palaT jaane ka KHatra ho agar bilkul kinare hi

palaT jaane kā ḳhatra ho agar bilkul kināre hī

shikasta naav phir dariyā meñ koī kyoñ utāre hī

vagarna faisla munsif hamāre haq meñ jā.egā

hamārā faisla karnā binā soche-vichāre hī

jise kahte haiñ sab duniyā ye vo bāzār hai jis meñ

mohabbat DhūñDhne vaale phireñge maare maare hī

ab aksar nafratoñ kī aag hī uThtī hai dhartī se

ab aksar āsmāñ se bhī baraste haiñ sharāre hī

zarūrat lab-kushā.ī kī nahīñ kuchh ḳhaas hai is meñ

mohabbat meñ ziyāda kaam aate haiñ ishāre hī

duā jab ḳhaas koī māñgnī hogī hameñ us vaqt

gireñge baal palkoñ se na TūTeñge sitāre hī

mohabbat kī tarah ham se siyāsat pesh aatī hai

na rakhtī hai qarīb apne na kartī hai kināre hī

ḳhushī kā aasrā hogā yahāñ mushkil se pal-do-pal

kaTegī umr duniyā meñ faqat ġham ke sahāre hī

mohabbat meñ nazar tum par nahīñ jā.egī duniyā kī

sabhī ilzām rakkhe jā.eñge sar par hamāre hī

kahāñ se lā.eñge itnā bujhāne ke liye paanī

zamīñ par dikhte haiñ har-sū hameñ jalte nazāre hī

mohabbat bechne niklo faqat is shart par 'balvant'

lageñge haath is byopār meñ keval ḳhasāre hī

palaT jaane ka KHatra ho agar bilkul kinare hi

shikasta naw phir dariya mein koi kyon utare hi

wagarna faisla munsif hamare haq mein jaega

hamara faisla karna bina soche-wichaare hi

jise kahte hain sab duniya ye wo bazar hai jis mein

mohabbat DhunDhne wale phirenge mare mare hi

ab aksar nafraton ki aag hi uThti hai dharti se

ab aksar aasman se bhi baraste hain sharare hi

zarurat lab-kushai ki nahin kuchh KHas hai is mein

mohabbat mein ziyaada kaam aate hain ishaare hi

dua jab KHas koi mangni hogi hamein us waqt

girenge baal palkon se na TuTenge sitare hi

mohabbat ki tarah hum se siyasat pesh aati hai

na rakhti hai qarib apne na karti hai kinare hi

KHushi ka aasra hoga yahan mushkil se pal-do-pal

kaTegi umr duniya mein faqat gham ke sahaare hi

mohabbat mein nazar tum par nahin jaegi duniya ki

sabhi ilzam rakkhe jaenge sar par hamare hi

kahan se laenge itna bujhane ke liye pani

zamin par dikhte hain har-su hamein jalte nazare hi

mohabbat bechne niklo faqat is shart par 'balwant'

lagenge hath is byopar mein kewal KHasare hi