palken uThin nigah mili baat ho gai

palkeñ uThīñ nigāh milī baat ho ga.ī

donoñ taraf se pursish-e-hālāt ho ga.ī

halkī sī raushnī bhī nahīñ duur duur tak

furqat kī raat kitnī baḌī raat ho ga.ī

rāh-e-junūñ meñ be-kas-o-tanhā chalā thā maiñ

hamrāh dil ke gardish-e-hālāt ho ga.ī

ye husn-e-ittifāq ki tum aa ga.e idhar

ḳhush-qismatī ki tum se mulāqāt ho ga.ī

ye vaqt aa gayā hai mirī be-kasī kī ḳhair

har ik se pūchhtā huuñ kahāñ raat ho ga.ī

ai chashm-e-intizār ye kyā e'tibār hai

vo aa chuke aur un se mulāqāt ho ga.ī

ai 'shauq' us ko hāsil-e-umr-e-ravāñ samajh

vo zindagī jo nazr-e-ḳharābāt ho ga.ī

palken uThin nigah mili baat ho gai

donon taraf se pursish-e-haalat ho gai

halki si raushni bhi nahin dur dur tak

furqat ki raat kitni baDi raat ho gai

rah-e-junun mein be-kas-o-tanha chala tha main

hamrah dil ke gardish-e-haalat ho gai

ye husn-e-ittifaq ki tum aa gae idhar

KHush-qismati ki tum se mulaqat ho gai

ye waqt aa gaya hai meri be-kasi ki KHair

har ek se puchhta hun kahan raat ho gai

ai chashm-e-intizar ye kya e'tibar hai

wo aa chuke aur un se mulaqat ho gai

ai 'shauq' us ko hasil-e-umr-e-rawan samajh

wo zindagi jo nazr-e-KHarabaat ho gai