palkon ki nok se utarte rahe

palkoñ kī nok se utarte rahe

is qadar ashk-e-ḳhvāb girte rahe

chāñd kī tarah raat jaage rahe

aur hamāre nasīb sote rahe

dost kaise nikalte pahlū se

saañp jo āstīñ meñ palte rahe

sharm-gīñ lahjoñ kī tamāzatoñ meñ

shab ke māthe pe phuul khilte rahe

jab koī ghar nahīñ rahā merā

mehrbāñ phir adū ke ḳheme rahe

un se to vo gurez-pā nahīñ hai

ham se achchhe havā ke jhoñke rahe

hijr kī āñdhiyoñ meñ bhī jānāñ

mo'atabar tere shoḳh lahje rahe

din to barsāt ke nahīñ the magar

ek ḳhushbū meñ phuul bhīge rahe

vo nazar kyā jhukī hamāre liye

umr-bhar dil ke taar uljhe rahe

talḳh-kāmī rahī vafāoñ maiñ

phal kahāñ is shajar ke mīThe rahe

is qadar pur-malāl mausam thā

zehn ke por-por jalte rahe

raat yādoñ ke band kamre meñ

ek tasvīr thāme kho.e rahe

ret ke pairahan meñ lipTe hue

kis qadar be-libās va.ade rahe

zindagī kī asaas the jo log

had hai un ke baġhair jiite rahe

ishtihā jhuuT thī nigāhoñ kī

bā-vafā bas nazar ke dhoke rahe

ham ko ehsās tujh se mil ke huā

kitne tere baġhair adhūre rahe

sāhiloñ par bane gharoñdoñ ke

kuchh ajīb-o-ġharīb da.ave rahe

hasrat-e-dil zabāñ pe laane tak

maslahat ke hazāroñ parde rahe

palkon ki nok se utarte rahe

is qadar ashk-e-KHwab girte rahe

chand ki tarah raat jage rahe

aur hamare nasib sote rahe

dost kaise nikalte pahlu se

sanp jo aastin mein palte rahe

sharm-gin lahjon ki tamazaton mein

shab ke mathe pe phul khilte rahe

jab koi ghar nahin raha mera

mehrban phir adu ke KHeme rahe

un se to wo gurez-pa nahin hai

hum se achchhe hawa ke jhonke rahe

hijr ki aandhiyon mein bhi jaanan

mo'atabar tere shoKH lahje rahe

din to barsat ke nahin the magar

ek KHushbu mein phul bhige rahe

wo nazar kya jhuki hamare liye

umr-bhar dil ke tar uljhe rahe

talKH-kaami rahi wafaon main

phal kahan is shajar ke miThe rahe

is qadar pur-malal mausam tha

zehn ke por-por jalte rahe

raat yaadon ke band kamre mein

ek taswir thame khoe rahe

ret ke pairahan mein lipTe hue

kis qadar be-libas wade rahe

zindagi ki asas the jo log

had hai un ke baghair jite rahe

ishtiha jhuT thi nigahon ki

ba-wafa bas nazar ke dhoke rahe

hum ko ehsas tujh se mil ke hua

kitne tere baghair adhure rahe

sahilon par bane gharondon ke

kuchh ajib-o-gharib dawe rahe

hasrat-e-dil zaban pe lane tak

maslahat ke hazaron parde rahe