palkon ki oT mein wo chhupa le gaya mujhe

palkoñ kī oT meñ vo chhupā le gayā mujhe

ya.anī nazar nazar se bachā le gayā mujhe

ab us ko apnī haar kahūñ yā kahūñ maiñ jiit

rūThā huā thā maiñ vo manā le gayā mujhe

muddat se ek raat bhī apnī nahīñ huī

har shaam koī aayā uThā le gayā mujhe

ho vāpsī agar to inheñ rāstoñ se ho

jin rāstoñ se pyaar tirā le gayā mujhe

ik jān-dār laash samajhiye mirā vajūd

ab kyā dharā hai koī churā le gayā mujhe

āvāgaman kī qaid se kyā chhūTtā kabhī

bas terā pyaar thā jo chhuḌā le gayā mujhe

dhartī kā ye safar mirā jis din huā tamām

jhoñkā havā kā aayā uḌā le gayā mujhe

tūfāñ ke baa'd maiñ bhī bahut TuuT sā gayā

dariyā phir apne ruḳh pe bahā le gayā mujhe

muddat ke baa'd 'nūr' hañsī lab pe aa.ī hai

vo apnā ham-ḳhayāl banā le gayā mujhe

palkon ki oT mein wo chhupa le gaya mujhe

yani nazar nazar se bacha le gaya mujhe

ab us ko apni haar kahun ya kahun main jit

ruTha hua tha main wo mana le gaya mujhe

muddat se ek raat bhi apni nahin hui

har sham koi aaya uTha le gaya mujhe

ho wapsi agar to inhen raston se ho

jin raston se pyar tera le gaya mujhe

ek jaan-dar lash samajhiye mera wajud

ab kya dhara hai koi chura le gaya mujhe

aawagaman ki qaid se kya chhuTta kabhi

bas tera pyar tha jo chhuDa le gaya mujhe

dharti ka ye safar mera jis din hua tamam

jhonka hawa ka aaya uDa le gaya mujhe

tufan ke ba'd main bhi bahut TuT sa gaya

dariya phir apne ruKH pe baha le gaya mujhe

muddat ke ba'd 'nur' hansi lab pe aai hai

wo apna ham-KHayal bana le gaya mujhe