palkon pe tairte hue mahshar tamam-shud

palkoñ pe tairte hue mahshar tamām-shud

āñkheñ khulīñ to ḳhvāb ke manzar tamām-shud

zinda hai bhuuk aaj bhī ifrīt kī tarah

tīr-o-tafañg-o-lashkar-o-ḳhanjar tamām-shud

logo tum apne zarf se baḌh kar diyā karo

is baar zaḳhm bhar ga.e nashtar tamām-shud

tahrīr kar rahā thā kahānī junūñ kī maiñ

lekin ḳhayāl-o-fikr kā mehvar tamām-shud

ḳhud apnā aks ā.inoñ meñ DhūñDte haiñ log

shīsha-garoñ ke shahr meñ paikar tamām-shud

jab dhuup oḌhe baiThī ho ġhurbat qatār meñ

samjho ḳhudī kā āḳhirī zevar tamām-shud

'zākir' rachī-basī koī sāzish fazā meñ thī

uḌne se peshtar merā shahpar tamām-shud

palkon pe tairte hue mahshar tamam-shud

aankhen khulin to KHwab ke manzar tamam-shud

zinda hai bhuk aaj bhi ifrit ki tarah

tir-o-tafang-o-lashkar-o-KHanjar tamam-shud

logo tum apne zarf se baDh kar diya karo

is bar zaKHm bhar gae nashtar tamam-shud

tahrir kar raha tha kahani junun ki main

lekin KHayal-o-fikr ka mehwar tamam-shud

KHud apna aks aainon mein DhunDte hain log

shisha-garon ke shahr mein paikar tamam-shud

jab dhup oDhe baiThi ho ghurbat qatar mein

samjho KHudi ka aaKHiri zewar tamam-shud

'zakir' rachi-basi koi sazish faza mein thi

uDne se peshtar mera shahpar tamam-shud