panah DhunD raha hai har ek makan ki taraf

panāh DhūñD rahā hai har ik makāñ kī taraf

ki bachcha dauḌ ke aatā hai jaise maañ kī taraf

amal se aap ke qadmoñ meñ kahkashāñ hogī

ye kyā ki dekhā kareñ aap kahkashāñ kī taraf

lahū se sīñchā huā gulsitāñ miTegā nahīñ

havā.eñ garm chaleñ laakh gulsitāñ kī taraf

ḳhabar ye sab ko hai paanī nahīñ sarāb hai vo

magar haiñ phir bhī sabhī sa.ī-e-rā.egāñ kī taraf

haTā rahe ho ye tinke to socho kyā hogā

parinde ā.eñge jis vaqt āshiyāñ kī taraf

ye rahnumāoñ ke baḳhshe hue añdhere haiñ

hameñ patā nahīñ ham chal paḌe kahāñ kī taraf

kisī ne pairoñ se kuchlā koī gulāb 'qamar'

mirī nigāh ne dekhā hai āsmāñ kī taraf

panah DhunD raha hai har ek makan ki taraf

ki bachcha dauD ke aata hai jaise man ki taraf

amal se aap ke qadmon mein kahkashan hogi

ye kya ki dekha karen aap kahkashan ki taraf

lahu se sincha hua gulsitan miTega nahin

hawaen garm chalen lakh gulsitan ki taraf

KHabar ye sab ko hai pani nahin sarab hai wo

magar hain phir bhi sabhi sai-e-raegan ki taraf

haTa rahe ho ye tinke to socho kya hoga

parinde aaenge jis waqt aashiyan ki taraf

ye rahnumaon ke baKHshe hue andhere hain

hamein pata nahin hum chal paDe kahan ki taraf

kisi ne pairon se kuchla koi gulab 'qamar'

meri nigah ne dekha hai aasman ki taraf