pankhuDi lab hain to aariz hain gul-e-tar ki tarah

pankhuḌī lab haiñ to aariz haiñ gul-e-tar kī tarah

mast āñkheñ haiñ chhalakte hue sāġhar kī tarah

chāñdnī sahn-e-chaman mauj-e-havā kaif-e-bahār

tū nahīñ hai to har ik shai hai sitamgar kī tarah

ashk-e-ġham ko mire dekhe na hiqārat se koī

qatra qatra hai haqīqat meñ samundar kī tarah

kyā miTā.egā koī saf.ha-e-hastī se hameñ

ham zamāne meñ nahīñ harf-e-mukarrar kī tarah

dekh kar aaj kī tahzīb ko mā.il-ba-zavāl

fikr ḳhāmosh hai sanjīda suḳhanvar kī tarah

tīra-baḳhtī hai ye apnī ki zamāne kā karam

apne hī ghar meñ jo ham rahte haiñ be-ghar kī tarah

kaun batlā.e kise rāh-ravī ke ādāb

ab to rahzan bhī nazar aate haiñ rahbar kī tarah

ho ga.ī vo bhī kisī shoḳh kī zulfoñ kī asiir

nik.hat-e-gul hai pareshāñ dil-e-muztar kī tarah

sajda-e-shukr-e-ḳhudā ham se adā kyā ho 'tarab'

dil to dīvāna-e-asnām hai aazar kī tarah

pankhuDi lab hain to aariz hain gul-e-tar ki tarah

mast aankhen hain chhalakte hue saghar ki tarah

chandni sahn-e-chaman mauj-e-hawa kaif-e-bahaar

tu nahin hai to har ek shai hai sitamgar ki tarah

ashk-e-gham ko mere dekhe na hiqarat se koi

qatra qatra hai haqiqat mein samundar ki tarah

kya miTaega koi safha-e-hasti se hamein

hum zamane mein nahin harf-e-mukarrar ki tarah

dekh kar aaj ki tahzib ko mail-ba-zawal

fikr KHamosh hai sanjida suKHanwar ki tarah

tira-baKHti hai ye apni ki zamane ka karam

apne hi ghar mein jo hum rahte hain be-ghar ki tarah

kaun batlae kise rah-rawi ke aadab

ab to rahzan bhi nazar aate hain rahbar ki tarah

ho gai wo bhi kisi shoKH ki zulfon ki asir

nikhat-e-gul hai pareshan dil-e-muztar ki tarah

sajda-e-shukr-e-KHuda hum se ada kya ho 'tarab'

dil to diwana-e-asnam hai aazar ki tarah