پنکھڑی لب ہیں تو عارض ہیں گل تر کی طرح

پنکھڑی لب ہیں تو عارض ہیں گل تر کی طرح

مست آنکھیں ہیں چھلکتے ہوئے ساغر کی طرح

چاندنی صحن‌ چمن موج ہوا کیف بہار

تو نہیں ہے تو ہر اک شے ہے ستم گر کی طرح

اشک غم کو مرے دیکھے نہ حقارت سے کوئی

قطرہ قطرہ ہے حقیقت میں سمندر کی طرح

کیا مٹائے گا کوئی صفحۂ ہستی سے ہمیں

ہم زمانے میں نہیں حرف مکرر کی طرح

دیکھ کر آج کی تہذیب کو مائل بہ زوال

فکر خاموش ہے سنجیدہ سخنور کی طرح

تیرہ بختی ہے یہ اپنی کہ زمانے کا کرم

اپنے ہی گھر میں جو ہم رہتے ہیں بے گھر کی طرح

کون بتلائے کسے راہ روی کے آداب

اب تو رہزن بھی نظر آتے ہیں رہبر کی طرح

ہو گئی وہ بھی کسی شوخ کی زلفوں کی اسیر

نکہت گل ہے پریشاں دل مضطر کی طرح

سجدۂ شکر خدا ہم سے ادا کیا ہو طربؔ

دل تو دیوانۂ اصنام ہے آزر کی طرح