par-e-jibril bhi jis rah mein jal jate hain

par-e-jibrīl bhī jis raah meñ jal jaate haiñ

ham vahāñ se bhī bahut duur nikal jaate haiñ

mahfil-e-dil ko hai māñge ke ujāle se gurez

diip dāġhoñ ke sar-e-shām hī jal jaate haiñ

saaf uḌ jaatā hai ḳhāsān-e-ḳharābāt kā rañg

ham vo mai-ḳhvār haiñ pī pī ke sambhal jaate haiñ

ik haqīqat hī haqīqat hai azal ho ki abad

vaise afsānoñ ke unvān badal jaate haiñ

dekhiye naqsh-e-kaf-e-pā-e-vafā kā e.ajāz

rāste duudh ke mānind ubal jaate haiñ

zindagī asl meñ ta.amīr-e-mohabbat hai 'hayāt'

de ke ham dahr ko paiġhām-e-amal jaate haiñ

par-e-jibril bhi jis rah mein jal jate hain

hum wahan se bhi bahut dur nikal jate hain

mahfil-e-dil ko hai mange ke ujale se gurez

dip daghon ke sar-e-sham hi jal jate hain

saf uD jata hai KHasan-e-KHarabaat ka rang

hum wo mai-KHwar hain pi pi ke sambhal jate hain

ek haqiqat hi haqiqat hai azal ho ki abad

waise afsanon ke unwan badal jate hain

dekhiye naqsh-e-kaf-e-pa-e-wafa ka eajaz

raste dudh ke manind ubal jate hain

zindagi asl mein tamir-e-mohabbat hai 'hayat'

de ke hum dahr ko paigham-e-amal jate hain