par jo tolen to par na jae kahin

par jo toleñ to par na jaa.e kahīñ

sar uThā.eñ to sar na jaa.e kahīñ

maiñ jo bikhrā to ġham nahīñ lekin

saath tū bhī bikhar na jaa.e kahīñ

dil-e-zinda se ham bhī zinda the

dil-e-zinda hī mar na jaa.e kahīñ

vo jo ik shaḳhs mujh meñ muḳhlis hai

mujh se pahle hī mar na jaa.e kahīñ

aadmī kāmyāb ho ki na ho

maut se pahle mar na jaa.e kahīñ

chaḌhte dariyā ko pūjne vaalo

chaḌhtā dariyā utar na jaa.e kahīñ

uḌ rahe haiñ fazāoñ meñ ḳhanjar

par bachā.ūñ to sar na jaa.e kahīñ

par jo tolen to par na jae kahin

sar uThaen to sar na jae kahin

main jo bikhra to gham nahin lekin

sath tu bhi bikhar na jae kahin

dil-e-zinda se hum bhi zinda the

dil-e-zinda hi mar na jae kahin

wo jo ek shaKHs mujh mein muKHlis hai

mujh se pahle hi mar na jae kahin

aadmi kaamyab ho ki na ho

maut se pahle mar na jae kahin

chaDhte dariya ko pujne walo

chaDhta dariya utar na jae kahin

uD rahe hain fazaon mein KHanjar

par bachaun to sar na jae kahin