پر ذرا ٹوٹے ہوئے سے مری تقدیر کے ہیں

پر ذرا ٹوٹے ہوئے سے مری تقدیر کے ہیں

حوصلے زندہ مگر آج بھی تعمیر کے ہیں

جب لہو آنکھ سے ٹپکے گا چمک جائیں گے

رنگ پھیکے ابھی احساس کی تصویر کے ہیں

خواب جو تم نے دکھائے تھے وہ سب دیکھ لیے

مسئلے اب تو یہاں خواب کی تعبیر کے ہیں

خوب پہچانتا ہے دل ترے تیروں کا مزاج

زخم جتنے بھی لگے ہیں وہ ترے تیر کے ہیں

زندگی ایک تسلسل غم و آلام کا ہے

اور ہم لوگ بھی قیدی اسی زنجیر کے ہیں

نفرتیں پھوٹ پڑیں بن کے لہو کا سیلاب

کتنے زہریلے یہ جملے تری تقریر کے ہیں

صاحب لوح و قلم اس کے سوا کوئی نہیں

سارے گل بوٹے نیازؔ اس کی ہی تحریر کے ہیں