par zara TuTe hue se meri taqdir ke hain

par zarā TuuTe hue se mirī taqdīr ke haiñ

hausle zinda magar aaj bhī ta.amīr ke haiñ

jab lahū aañkh se Tapkegā chamak jā.eñge

rang phīke abhī ehsās kī tasvīr ke haiñ

ḳhvāb jo tum ne dikhā.e the vo sab dekh liye

mas.ale ab to yahāñ ḳhvāb kī ta.abīr ke haiñ

ḳhuub pahchāntā hai dil tire tīroñ kā mizāj

zaḳhm jitne bhī lage haiñ vo tire tiir ke haiñ

zindagī ek tasalsul ġham-o-ālām kā hai

aur ham log bhī qaidī usī zanjīr ke haiñ

nafrateñ phuuT paḌīñ ban ke lahū kā sailāb

kitne zahrīle ye jumle tirī taqrīr ke haiñ

sāhib-e-lauh-o-qalam us ke sivā koī nahīñ

saare gul-būTe 'niyāz' us kī hī tahrīr ke haiñ

par zara TuTe hue se meri taqdir ke hain

hausle zinda magar aaj bhi tamir ke hain

jab lahu aankh se Tapkega chamak jaenge

rang phike abhi ehsas ki taswir ke hain

KHwab jo tum ne dikhae the wo sab dekh liye

masale ab to yahan KHwab ki tabir ke hain

KHub pahchanta hai dil tere tiron ka mizaj

zaKHm jitne bhi lage hain wo tere tir ke hain

zindagi ek tasalsul gham-o-alam ka hai

aur hum log bhi qaidi usi zanjir ke hain

nafraten phuT paDin ban ke lahu ka sailab

kitne zahrile ye jumle teri taqrir ke hain

sahib-e-lauh-o-qalam us ke siwa koi nahin

sare gul-buTe 'niyaz' us ki hi tahrir ke hain