parai bhiD mein kaise juda lagunga main

parā.ī bhiiḌ meñ kaise judā lagūñgā maiñ

akelā hūñgā to sab ko ḳhudā lagūñgā maiñ

abhī to ret kī sūrat uḌā rahe ho mujhe

zarā sī der ruko aa.ina lagūñgā maiñ

burā lagegā koī din tujhe badan kā ḳhayāl

phir ek shab tire siine se aa lagūñgā maiñ

safar meñ tujh pe kabhī ahmiyat khulegī mirī

bhaTakne vaale tujhe rāsta lagūñgā maiñ

tire ġhubār ne merī chamak ghaTā dī hai

havā chalegī to phir se nayā lagūñgā maiñ

pahan liyā thā kisī roz baap kā juutā

mujhe lagā thā ki aise baḌā lagūñgā maiñ

ḳhudā-parastoñ ne kāfir samajh ke maar diyā

pata nahīñ ki farishtoñ ko kyā lagūñgā maiñ

shikast khā ke bhī merī anā bachī rahegī

ujaḌte vaqt bhī us ko harā lagūñgā maiñ

ajab nahīñ hai ki mub.ham rahe qarīb kī shai

zamīñ kī aañkh se dekho ḳhalā lagūñgā maiñ

hazāroñ vāqiye maiñ ne nigal liye 'hamza'

muarraḳhīn ko ātish-kada lagūñgā maiñ

parai bhiD mein kaise juda lagunga main

akela hunga to sab ko KHuda lagunga main

abhi to ret ki surat uDa rahe ho mujhe

zara si der ruko aaina lagunga main

bura lagega koi din tujhe badan ka KHayal

phir ek shab tere sine se aa lagunga main

safar mein tujh pe kabhi ahmiyat khulegi meri

bhaTakne wale tujhe rasta lagunga main

tere ghubar ne meri chamak ghaTa di hai

hawa chalegi to phir se naya lagunga main

pahan liya tha kisi roz bap ka juta

mujhe laga tha ki aise baDa lagunga main

KHuda-paraston ne kafir samajh ke mar diya

pata nahin ki farishton ko kya lagunga main

shikast kha ke bhi meri ana bachi rahegi

ujaDte waqt bhi us ko hara lagunga main

ajab nahin hai ki mubham rahe qarib ki shai

zamin ki aankh se dekho KHala lagunga main

hazaron waqiye main ne nigal liye 'hamza'

muarraKHin ko aatish-kada lagunga main