paraya lag raha tha jo wahi apna nikal aaya

parāyā lag rahā thā jo vahī apnā nikal aayā

mirā ik ajnabī se duur kā rishta nikal aayā

abhī tak to tirī yādeñ mirī mīrās thiiñ lekin

tasavvur meñ kahāñ se ik nayā chehra nikal aayā

vo dariyā hai ye kahne meñ mujhe ab sharm aatī hai

mujhe sairāb kyā kartā vo ḳhud pyāsā nikal aayā

isī ummīd par sab ashk meñ ne sarf kar Daale

agar in motiyoñ meñ ek bhī sachchā nikal aayā

vo merī zindagī bhar kī kamā.ī hī sahī lekin

maiñ kyā kartā vahī sikka agar khoTā nikal aayā

mujhe us bazm meñ yaad aa ga.iiñ tanhā.iyāñ apnī

maiñ sab ko chhoḌ ke us bazm se tanhā nikal aayā

mujhe chāroñ taraf se manziloñ ne gher rakkhā thā

yahāñ se bhī nikalne kā magar rasta nikal aayā

añdherā thā to ye saare shajar kitne akele the

khulī jo dhuup to har peḌ se saaya nikal aayā

paraya lag raha tha jo wahi apna nikal aaya

mera ek ajnabi se dur ka rishta nikal aaya

abhi tak to teri yaaden meri miras thin lekin

tasawwur mein kahan se ek naya chehra nikal aaya

wo dariya hai ye kahne mein mujhe ab sharm aati hai

mujhe sairab kya karta wo KHud pyasa nikal aaya

isi ummid par sab ashk mein ne sarf kar Dale

agar in motiyon mein ek bhi sachcha nikal aaya

wo meri zindagi bhar ki kamai hi sahi lekin

main kya karta wahi sikka agar khoTa nikal aaya

mujhe us bazm mein yaad aa gain tanhaiyan apni

main sab ko chhoD ke us bazm se tanha nikal aaya

mujhe chaaron taraf se manzilon ne gher rakkha tha

yahan se bhi nikalne ka magar rasta nikal aaya

andhera tha to ye sare shajar kitne akele the

khuli jo dhup to har peD se saya nikal aaya