parchhaiyon ke shahr zamin par basa diye

parchhā.iyoñ ke shahr zamīñ par basā diye

badlī haTā ke chāñd ne jañgal sajā diye

kitne hī dā.eroñ meñ baTā markaz-e-ḳhayāl

ik but ke ham ne saikaḌoñ paikar banā diye

TuuTe kisī tarah to fazāoñ kā ye jumūd

āñdhī rukī to ham ne nasheman jalā diye

ab rāstoñ kī gard se aTte nahīñ badan

naqsh-e-qadam asīr-e-gul-e-tar banā diye

ik chāñd kī talāsh meñ ghūme nagar nagar

lauTe to āsmāñ ne sitāre bujhā diye

baazī to ham ne aaj bhī haarī nahīñ huzūr

nazreñ bachā ke aap ne mohre uThā diye

Thahrī huī havā meñ bhaḌakte nahīñ charāġh

jhoñkoñ ne lau baḌhā.ī diye jagmagā diye

'anjum' laboñ meñ jazb huiiñ talḳhiyāñ tamām

murjhā ga.ī bahār jo ham muskurā diye

parchhaiyon ke shahr zamin par basa diye

badli haTa ke chand ne jangal saja diye

kitne hi daeron mein baTa markaz-e-KHayal

ek but ke hum ne saikaDon paikar bana diye

TuTe kisi tarah to fazaon ka ye jumud

aandhi ruki to hum ne nasheman jala diye

ab raston ki gard se aTte nahin badan

naqsh-e-qadam asir-e-gul-e-tar bana diye

ek chand ki talash mein ghume nagar nagar

lauTe to aasman ne sitare bujha diye

bazi to hum ne aaj bhi haari nahin huzur

nazren bacha ke aap ne mohre uTha diye

Thahri hui hawa mein bhaDakte nahin charagh

jhonkon ne lau baDhai diye jagmaga diye

'anjum' labon mein jazb huin talKHiyan tamam

murjha gai bahaar jo hum muskura diye