parda-e-gham mein dikhaya jalwa-e-kaamil mujhe

parda-e-ġham meñ dikhāyā jalva-e-kāmil mujhe

le uḌī yārab kahāñ merī fazā-e-dil mujhe

merī manzil kyoñ na ho mushkil se bhī mushkil mujhe

har qadam ik raah hai har raah ik manzil mujhe

har-nafas meñ ārzū-e-dil milī haa.il mujhe

har qadam par pesh aa.ī ik na.ī manzil mujhe

ab ye kyā hai tū ne shān-e-sarfaroshī dekh lī

ḳhalq kyoñ kahne lagī bismil tujhe qātil mujhe

maut bhī mahkūm niklī us nigāh-e-nāz kī

ek marnā sahl thā vo bhī huā mushkil mujhe

dekh leñ vo bhī ki dil vāloñ se parda tā-kujā

do ghaḌī ko be-ḳhudī tū kar bhī de ġhāfil mujhe

tere majbūr-e-vafā ko mashġhala mil hī gayā

dil ko maiñ samjhā rahā huuñ aur merā dil mujhe

maiñ bhaTaktā hī rahā har anjuman har bazm meñ

aur milī ḳhalvat meñ ghar baiThe tirī mahfil mujhe

ab to 'sarvar' 'ishq ne āzād īmāñ kar diyā

laakh bahkāyā kare farq-e-haq-o-bātil mujhe

parda-e-gham mein dikhaya jalwa-e-kaamil mujhe

le uDi yarab kahan meri faza-e-dil mujhe

meri manzil kyon na ho mushkil se bhi mushkil mujhe

har qadam ek rah hai har rah ek manzil mujhe

har-nafas mein aarzu-e-dil mili hail mujhe

har qadam par pesh aai ek nai manzil mujhe

ab ye kya hai tu ne shan-e-sarfaroshi dekh li

KHalq kyon kahne lagi bismil tujhe qatil mujhe

maut bhi mahkum nikli us nigah-e-naz ki

ek marna sahl tha wo bhi hua mushkil mujhe

dekh len wo bhi ki dil walon se parda ta-kuja

do ghaDi ko be-KHudi tu kar bhi de ghafil mujhe

tere majbur-e-wafa ko mashghala mil hi gaya

dil ko main samjha raha hun aur mera dil mujhe

main bhaTakta hi raha har anjuman har bazm mein

aur mili KHalwat mein ghar baiThe teri mahfil mujhe

ab to 'sarwar' 'ishq ne aazad iman kar diya

lakh bahkaya kare farq-e-haq-o-baatil mujhe