parda-e-husn-e-zat mein anjuman-e-sifat mein

parda-e-husn-e-zāt meñ anjuman-e-sifāt meñ

mere sivā hai aur kaun sīna-e-kā.enāt meñ

farsh kī vus'ateñ bhī gum 'arsh kī rif'ateñ bhī jazb

mere taḳhayyulāt meñ mere tasavvurāt meñ

naġhma-e-be-sadā huuñ maiñ nāz-e-girah-kushā huuñ maiñ

sham.a-e-rah-e-hudā huuñ maiñ zulmat-e-shash-jihāt meñ

merī hī fitrat-e-qadīm sarhad-e-lā-makāñ se duur

merā hī naqsh-e-nā-tamām qaid-e-ta.a.īnāt meñ

mere vajūd-e-ḳhās se silsila-e-fanā-baqā

mujh se hī raunaq-e-tamām bazm-e-tajalliyāt meñ

merī hī fikr-e-maḳhfī-o-mashq-e-nazar ke faiz se

jazb-o-kashish kī quvvateñ hastī-e-be-sabāt meñ

'ārzū' apne raaz ko samjhā huuñ maiñ bas is qadar

mujh meñ hijāb-e-zāt hai maiñ huuñ hijāb-e-zāt meñ

parda-e-husn-e-zat mein anjuman-e-sifat mein

mere siwa hai aur kaun sina-e-kaenat mein

farsh ki wus'aten bhi gum 'arsh ki rif'aten bhi jazb

mere taKHayyulat mein mere tasawwuraat mein

naghma-e-be-sada hun main naz-e-girah-kusha hun main

shama-e-rah-e-huda hun main zulmat-e-shash-jihat mein

meri hi fitrat-e-qadim sarhad-e-la-makan se dur

mera hi naqsh-e-na-tamam qaid-e-tainat mein

mere wajud-e-KHas se silsila-e-fana-baqa

mujh se hi raunaq-e-tamam bazm-e-tajalliyat mein

meri hi fikr-e-maKHfi-o-mashq-e-nazar ke faiz se

jazb-o-kashish ki quwwaten hasti-e-be-sabaat mein

'arzu' apne raaz ko samjha hun main bas is qadar

mujh mein hijab-e-zat hai main hun hijab-e-zat mein