parda-e-saz mein bhi soz ka hamil hona

parda-e-sāz meñ bhī soz kā hāmil honā

sham' se siikh sharīk-e-ġham-e-mahfil honā

bazm-e-hastī pe hai mushkil mirā maa.il honā

mujh ko aatā nahīñ sar-gashta-e-bātil honā

nāḳhudā tū mujhe ālūda-e-tūfāñ na samajh

mauj-e-dariyā ko sikhātā huuñ maiñ sāhil honā

sāzgār aaj mujhe raah bhī hai rahbar bhī

merī qismat meñ hai āsūda-e-manzil honā

rishta-e-hosh hai vābasta tujhī se ai dost

kabhī mumkin nahīñ tujh se mirā ġhāfil honā

dil se hushiyār ki hai dil hī tirā 'ain hayāt

maut se bhī hai sivā be-ḳhabar-e-dil honā

sa'ī ke baa'd na kar kāvish-e-fikr-e-anjām

lā.anat-e-sa.ī hai zahmat-kash-e-hāsil honā

bārish-e-abr se bijlī kī lagī bujh na sakī

ġhair-mumkin hai ilāj-e-tapish-e-dil na honā

har qadam par rah-e-hastī meñ na.ī Thokar hai

ai 'ziyā' sahl nahīñ fā.ez-e-manzil honā

parda-e-saz mein bhi soz ka hamil hona

sham' se sikh sharik-e-gham-e-mahfil hona

bazm-e-hasti pe hai mushkil mera mail hona

mujh ko aata nahin sar-gashta-e-baatil hona

naKHuda tu mujhe aaluda-e-tufan na samajh

mauj-e-dariya ko sikhata hun main sahil hona

sazgar aaj mujhe rah bhi hai rahbar bhi

meri qismat mein hai aasuda-e-manzil hona

rishta-e-hosh hai wabasta tujhi se ai dost

kabhi mumkin nahin tujh se mera ghafil hona

dil se hushiyar ki hai dil hi tera 'ain hayat

maut se bhi hai siwa be-KHabar-e-dil hona

sa'i ke ba'd na kar kawish-e-fikr-e-anjam

laanat-e-sai hai zahmat-kash-e-hasil hona

barish-e-abr se bijli ki lagi bujh na saki

ghair-mumkin hai ilaj-e-tapish-e-dil na hona

har qadam par rah-e-hasti mein nai Thokar hai

ai 'ziya' sahl nahin faez-e-manzil hona