parda haTa ke jab wo hasin muskuraega

parda haTā ke jab vo hasīñ muskurā.egā

bijlī hamāre hosh-o-ḳhirad par girā.egā

kyā thī ḳhabar ki tark-e-ta.alluq ke baad bhī

ham ko vo shoḳh parda-nashīñ yaad aa.egā

ummīd-o-ārzū kī tabāhī to dekh lī

ab aur kyā hameñ ye muqaddar dikhā.egā

ai qalb-e-zār sabr-o-tahammul se kaam le

kab tak kisī kī yaad meñ aañsū bahā.egā

merī zabāñ se sun na sake vo agar to kyā

rūdād merī un ko zamāna sunā.egā

jis raaz ko chhupā na sake qais-o-kohkan

ai qalb-e-ġham-nasīb tū kaise chhupā.egā

'nayyar' ġhamoñ kī tez havāoñ ke sāmne

kab tak ḳhayāl-o-ḳhvāb kī sham.a jalā.egā

parda haTa ke jab wo hasin muskuraega

bijli hamare hosh-o-KHirad par giraega

kya thi KHabar ki tark-e-talluq ke baad bhi

hum ko wo shoKH parda-nashin yaad aaega

ummid-o-arzu ki tabahi to dekh li

ab aur kya hamein ye muqaddar dikhaega

ai qalb-e-zar sabr-o-tahammul se kaam le

kab tak kisi ki yaad mein aansu bahaega

meri zaban se sun na sake wo agar to kya

rudad meri un ko zamana sunaega

jis raaz ko chhupa na sake qais-o-kohkan

ai qalb-e-gham-nasib tu kaise chhupaega

'nayyar' ghamon ki tez hawaon ke samne

kab tak KHayal-o-KHwab ki shama jalaega