parda kis amr ka hai ab is bad-nasib se

parda kis amr kā hai ab is bad-nasīb se

kahiye to baat raat kī kah duuñ raqīb se

dekhe jo dil ke daaġh to bole raqīb se

milte haiñ aise chāñd ke TukḌe nasīb se

chohleñ haiñ mujh ġharīb se chheḌeñ raqīb se

paḌtā hai kaam dekhiye kis ḳhush-nasīb se

is martaba junūñ meñ yahī mashġhala rahā

de de ke phuul daaġh liye andalīb se

tum ho kalīm dekhne vāloñ meñ duur ke

luuTe haiñ ham ne yaar ke jalve qarīb se

achchhe haiñ ik jahān se us ke marīz-e-ishq

un ko davā se kaam na matlab tabīb se

kam-baḳht kī zabān se niklī hai koī baat

kaliyāñ haiñ muñh phulā.e hue andalīb se

vaa.iz tirī bahisht kā ham jānte haiñ haal

dilchaspiyāñ baḌhā na bayān-e-ajīb se

jo bad-mizāj de na tasallī marīz ko

achchhā hai ishtidād-e-maraz us tabīb se

kāñToñ ke badle phuul chune kis ne ai junūñ

sun aa.e haiñ chaman meñ vo kuchh andalīb se

kāfir tire sivā jo kisī kī ho aarzū

ham duur hoñ ḳhudā se ḳhudā ke habīb se

is zo.af meñ ye haal hai miltī nahīñ use

chaltī hai chaal nabz hamārī tabīb se

allāh re ḳhulūs ki manzil abhī hai duur

ġhurbat kī shaam aa ke milī mujh ġharīb se

detī hai ye zarūr jo ḳhud baiThtī hai vo

jhuktī hai shāḳh-e-gul bhī zarā andalīb se

poshīda dil meñ hai kisī parda-nashīñ kā ishq

dard-e-nihāñ kā haal kahūñ kyā tabīb se

tujh meñ paḌī hai jaan hamārī paḌī bhī rah

ai aarzū na jā dil-e-hasrat-nasīb se

laa.ī kuchh un ke vāste kuchh apne vāste

gulbun se phuul daaġh liye andalīb se

sar bhī subū-e-sar bhī bachā aaj baal baal

zāhid ne baḌh ke kaam liyā thā jarīb se

din dopahar na aaj ho andher to sahī

guzrīñ zarā vo hashr meñ mere qarīb se

bal gesuoñ se baḌh ke jabīñ par paḌe hue

koī ye jaane aa.e haiñ laḌ kar raqīb se

duniyā kī koī baat nahīñ jānte 'riyāz'

ik shaḳhs haiñ 'riyāz' bahut hī ġharīb se

parda kis amr ka hai ab is bad-nasib se

kahiye to baat raat ki kah dun raqib se

dekhe jo dil ke dagh to bole raqib se

milte hain aise chand ke TukDe nasib se

chohlen hain mujh gharib se chheDen raqib se

paDta hai kaam dekhiye kis KHush-nasib se

is martaba junun mein yahi mashghala raha

de de ke phul dagh liye andalib se

tum ho kalim dekhne walon mein dur ke

luTe hain hum ne yar ke jalwe qarib se

achchhe hain ek jahan se us ke mariz-e-ishq

un ko dawa se kaam na matlab tabib se

kam-baKHt ki zaban se nikli hai koi baat

kaliyan hain munh phulae hue andalib se

waiz teri bahisht ka hum jaante hain haal

dilchaspiyan baDha na bayan-e-ajib se

jo bad-mizaj de na tasalli mariz ko

achchha hai ishtidad-e-maraz us tabib se

kanTon ke badle phul chune kis ne ai junun

sun aae hain chaman mein wo kuchh andalib se

kafir tere siwa jo kisi ki ho aarzu

hum dur hon KHuda se KHuda ke habib se

is zoaf mein ye haal hai milti nahin use

chalti hai chaal nabz hamari tabib se

allah re KHulus ki manzil abhi hai dur

ghurbat ki sham aa ke mili mujh gharib se

deti hai ye zarur jo KHud baiThti hai wo

jhukti hai shaKH-e-gul bhi zara andalib se

poshida dil mein hai kisi parda-nashin ka ishq

dard-e-nihan ka haal kahun kya tabib se

tujh mein paDi hai jaan hamari paDi bhi rah

ai aarzu na ja dil-e-hasrat-nasib se

lai kuchh un ke waste kuchh apne waste

gulbun se phul dagh liye andalib se

sar bhi subu-e-sar bhi bacha aaj baal baal

zahid ne baDh ke kaam liya tha jarib se

din dopahar na aaj ho andher to sahi

guzrin zara wo hashr mein mere qarib se

bal gesuon se baDh ke jabin par paDe hue

koi ye jaane aae hain laD kar raqib se

duniya ki koi baat nahin jaante 'riyaz'

ek shaKHs hain 'riyaz' bahut hi gharib se