parda paDa hua tha KHudi ne uTha diya

parda paḌā huā thā ḳhudī ne uThā diyā

apnī hī ma.arifat ne tumhārā pata diyā

dar dar kī Thokaroñ ne sharaf ko miTā diyā

qudrat ne kyuuñ ġharīb ko insāñ banā diyā

apne vajūd kā bhī to koī subūt ho

maiñ thā kahāñ ki mujh ko kisī ne miTā diyā

allāh re jab.ha sā.i-e-ḳhāk-e-harīm-e-dost

bande ko banda sajde ko sajda banā diyā

his murda thī hayāt-e-musalsal meñ ziist kī

taḳhrīb-e-zindagī ne payām-e-baqā diyā

phir us ke ghar meñ ho na sakī raushnī kabhī

jis kā charāġh tū ne jalā kar bujhā diyā

koī ḳhushī ḳhushī nahīñ apne liye 'shafīq'

kis kī nigāh ne sabaq-e-ġham paḌhā diyā

parda paDa hua tha KHudi ne uTha diya

apni hi marifat ne tumhaara pata diya

dar dar ki Thokaron ne sharaf ko miTa diya

qudrat ne kyun gharib ko insan bana diya

apne wajud ka bhi to koi subut ho

main tha kahan ki mujh ko kisi ne miTa diya

allah re jabha sai-e-KHak-e-harim-e-dost

bande ko banda sajde ko sajda bana diya

his murda thi hayat-e-musalsal mein zist ki

taKHrib-e-zindagi ne payam-e-baqa diya

phir us ke ghar mein ho na saki raushni kabhi

jis ka charagh tu ne jala kar bujha diya

koi KHushi KHushi nahin apne liye 'shafiq'

kis ki nigah ne sabaq-e-gham paDha diya