parda uTha ke chashm-e-taghaful-nigar se aap

parda uThā ke chashm-e-taġhāful-nigar se aap

dil kā jamāl dekhiye dil kī nazar se aap

ġhāfil haiñ husn-o-ishq ḳhud apne asar se aap

kuchh be-ḳhabar se ham bhī haiñ kuchh be-ḳhabar se aap

nazreñ churā rahe haiñ jo ahl-e-nazar se aap

ā.īne ko chhupāte haiñ ā.īna-gar se aap

sahmī huī duā.eñ haiñ naale Dare hue

māyūs yuuñ koī na ho apne asar se aap

garmā rahī hai qalb ko ik barq-e-be-ḳhudī

jalve hameñ dikhāte haiñ āḳhir kidhar se aap

har har qadam pe sajdoñ ke milte haiñ kuchh nishāñ

shāyad ki aaj guzre haiñ is rahguzar se aap

har zarra-e-nazar hai gulistāñ banā huā

aa.ī bahār guzre haiñ yā rahguzar se aap

ḳhuddāriyoñ kā paas bhī ai shān-e-munfa.il

mar.ūb hoñ na chashm-e-mohabbat-asar se aap

dushvār haiñ rasā.iyāñ dāmān-e-dost tak

qatrāt-e-ashk khulte nahīñ chashm-e-tar se aap

dīvār-e-lā-makāñ ho ki parde hijāb ke

chhupte nahīñ haiñ chashm-e-haqīqat-nigar se aap

jalve bhī ḳhud nigāh ke parde meñ ai 'munīr'

dekhā unheñ to chhup ga.e apnī nazar se aap

parda uTha ke chashm-e-taghaful-nigar se aap

dil ka jamal dekhiye dil ki nazar se aap

ghafil hain husn-o-ishq KHud apne asar se aap

kuchh be-KHabar se hum bhi hain kuchh be-KHabar se aap

nazren chura rahe hain jo ahl-e-nazar se aap

aaine ko chhupate hain aaina-gar se aap

sahmi hui duaen hain nale Dare hue

mayus yun koi na ho apne asar se aap

garma rahi hai qalb ko ek barq-e-be-KHudi

jalwe hamein dikhate hain aaKHir kidhar se aap

har har qadam pe sajdon ke milte hain kuchh nishan

shayad ki aaj guzre hain is rahguzar se aap

har zarra-e-nazar hai gulistan bana hua

aai bahaar guzre hain ya rahguzar se aap

KHuddariyon ka pas bhi ai shan-e-munfail

marub hon na chashm-e-mohabbat-asar se aap

dushwar hain rasaiyan daman-e-dost tak

qatraat-e-ashk khulte nahin chashm-e-tar se aap

diwar-e-la-makan ho ki parde hijab ke

chhupte nahin hain chashm-e-haqiqat-nigar se aap

jalwe bhi KHud nigah ke parde mein ai 'munir'

dekha unhen to chhup gae apni nazar se aap