parde mein KHamushi ke suKHan bolne lage

parde meñ ḳhāmushī ke suḳhan bolne lage

kaaTī ga.ī zabāñ to nayan bolne lage

qātil to mutma.in thā Thikāne lagā ke laash

kāfūr chīḳh uTThe kafan bolne lage

ahl-e-chaman ne kho dī basīrat to yuuñ huā

gulshan ke saare zāġh-o-zaġhan bolne lage

yuuñ bhī huā hai laakh mukhoToñ ke bāvajūd

sab āv-tāv chāl-chalan bolne lage

jab taan lī hai raat ne ḳhāmoshī kī ridā

jugnū sitāre chāñd gagan bolne lage

bazm-e-tasavvurāt meñ maazī kā raqs thā

yādoñ ke ghuñghrū chhanā chhan bolne lage

ash.ār meñ yuuñ Dhāliye tasvīr-e-kā.enāt

jādū-bayāñ qalam rahe fan bolne lage

parde mein KHamushi ke suKHan bolne lage

kaTi gai zaban to nayan bolne lage

qatil to mutmain tha Thikane laga ke lash

kafur chiKH uTThe kafan bolne lage

ahl-e-chaman ne kho di basirat to yun hua

gulshan ke sare zagh-o-zaghan bolne lage

yun bhi hua hai lakh mukhoTon ke bawajud

sab aaw-taw chaal-chalan bolne lage

jab tan li hai raat ne KHamoshi ki rida

jugnu sitare chand gagan bolne lage

bazm-e-tasawwuraat mein mazi ka raqs tha

yaadon ke ghunghru chhana chhan bolne lage

ashaar mein yun Dhaaliye taswir-e-kaenat

jadu-bayan qalam rahe fan bolne lage