parde mein samt-e-gharb ke mahtab bhi gaya

parde meñ samt-e-ġharb ke mahtāb bhī gayā

aaya na yaar paas mirā ḳhvāb bhī gayā

tauba to kī magar na huī dil kī kam havas

lo haath se vo jām-e-mai-e-nāb bhī gayā

vo saḳht-jāñ huuñ maiñ ki na aa.ī qazā mujhe

me.ade meñ bārhā mire zahrāb bhī gayā

masjid meñ sar jhukāyā jo maiñ ne pa-e-namāz

sajde ke saath hī ḳham-e-mehrāb bhī gayā

sāya-fagan jo sar pe mire ibtidā se thā

hai hai vo aaj gulbun-e-shādāb bhī gayā

yaad aa.ī nāḳhudā ko mirī nā-shanāvarī

sar par se jab guzar mire sailāb bhī gayā

aa yaar saath saath shab-e-pardā-posh ke

ab to faroġh-e-mehr-e-jahāñ-tāb bhī gayā

jaadū ḳhayāl-e-yār hai ai ham-nashīñ na pūchh

pās-e-lihāz-dārī-e-ahbāb bhī gayā

duniyā se kaise kaise jafā-kesh uTh ga.e

ham 'shād' hī ko rote the 'nāyāb' bhī gayā

parde mein samt-e-gharb ke mahtab bhi gaya

aaya na yar pas mera KHwab bhi gaya

tauba to ki magar na hui dil ki kam hawas

lo hath se wo jam-e-mai-e-nab bhi gaya

wo saKHt-jaan hun main ki na aai qaza mujhe

meade mein barha mere zahrab bhi gaya

masjid mein sar jhukaya jo main ne pa-e-namaz

sajde ke sath hi KHam-e-mehrab bhi gaya

saya-fagan jo sar pe mere ibtida se tha

hai hai wo aaj gulbun-e-shadab bhi gaya

yaad aai naKHuda ko meri na-shanawari

sar par se jab guzar mere sailab bhi gaya

aa yar sath sath shab-e-parda-posh ke

ab to farogh-e-mehr-e-jahan-tab bhi gaya

jadu KHayal-e-yar hai ai ham-nashin na puchh

pas-e-lihaz-dari-e-ahbab bhi gaya

duniya se kaise kaise jafa-kesh uTh gae

hum 'shad' hi ko rote the 'nayab' bhi gaya