pareshan karne walon ko pareshan kaun dekhega

pareshāñ karne vāloñ ko pareshāñ kaun dekhegā

hamāre ba.ad ye rañg-e-gulistāñ kaun dekhegā

ba-juz mere ye dilchaspī kā sāmāñ kaun dekhegā

jalā kar dil ke dāġhoñ ko charāġhāñ kaun dekhegā

kise gulshan se itnā ishq hai merī tarah gulchīñ

qafas meñ rakh ke tasvīr-e-gulistāñ kaun dekhegā

use rañgīñ use sad-chāk honā chāhiye varna

tirā dāman mirā chāk-e-garebāñ kaun dekhegā

bajā.e sāġhar-e-mai tere maiḳhāne meñ ai saaqī

chaleñ jab botaleñ har-dam ḳhumistāñ kaun dekhegā

chaman ḳhud bāġhbāñ pāmāl kartā hai to hairat kyā

chaman to us ne dekhā hai bayābāñ kaun dekhegā

hakīm-e-vaqt huuñ maiñ hī agar gulshan se uTh jā.ūñ

to phir ai bāġhbāñ nabz-e-bahārāñ kaun dekhegā

bachā kar us ko rakkhā hai kaleje meñ ki phir tujh ko

jo chashm-e-ābla phūTī pashemāñ kaun dekhegā

duā.eñ kyuuñ na duuñ har dam nigāh-e-nāz-e-qātil ko

jo ye nashtar na ho sū-e-rag-e-jāñ kaun dekhegā

ġhanīmat ye bhī hai is daur meñ phir varna ai hamdam

janāb-e-'barq' sāhab sā suḳhan-dāñ kaun dekhegā

pareshan karne walon ko pareshan kaun dekhega

hamare baad ye rang-e-gulistan kaun dekhega

ba-juz mere ye dilchaspi ka saman kaun dekhega

jala kar dil ke daghon ko charaghan kaun dekhega

kise gulshan se itna ishq hai meri tarah gulchin

qafas mein rakh ke taswir-e-gulistan kaun dekhega

use rangin use sad-chaak hona chahiye warna

tera daman mera chaak-e-gareban kaun dekhega

bajae saghar-e-mai tere maiKHane mein ai saqi

chalen jab botalen har-dam KHumistan kaun dekhega

chaman KHud baghban pamal karta hai to hairat kya

chaman to us ne dekha hai bayaban kaun dekhega

hakim-e-waqt hun main hi agar gulshan se uTh jaun

to phir ai baghban nabz-e-bahaaran kaun dekhega

bacha kar us ko rakkha hai kaleje mein ki phir tujh ko

jo chashm-e-abla phuTi pasheman kaun dekhega

duaen kyun na dun har dam nigah-e-naz-e-qatil ko

jo ye nashtar na ho su-e-rag-e-jaan kaun dekhega

ghanimat ye bhi hai is daur mein phir warna ai hamdam

janab-e-'barq' sahab sa suKHan-dan kaun dekhega