pari shishe ke andar aa paDi hai

parī shīshe ke andar aa paḌī hai

mai-e-gulnār kī vaq.at baḌī hai

uThāyā sāġhar-e-zarrīñ to samjhe

pas-e-dīvār māshūqa khaḌī hai

diyā jab ki ḳhirāj-e-husn ham ne

ye choTī kis liye pīchhe paḌī hai

saf-e-dandāñ hai dahan-e-mushkbū meñ

ki sāñche motiyoñ kī ye laḌī hai

gumāñ hotā hai sumbul kī lachak par

kisī dast-e-nigārīñ meñ chhaḌī hai

ba-rabt-e-ḳhās ho taz.īn-e-ḳhātir

ye husn-o-ishq kī nāzuk kaḌī hai

huī āsā.ish-e-duniyā to hāsil

magar aage qayāmat kī ghaḌī hai

na chhūTī dīda-e-ushshāq se kyoñ

ye barkhā hai ki aañsū kī jhaḌī hai

huā naḳhchīr āḳhir nazr-e-tā.ir

nigah kis auj pe 'nasrīn' laḌī hai

pari shishe ke andar aa paDi hai

mai-e-gulnar ki waqat baDi hai

uThaya saghar-e-zarrin to samjhe

pas-e-diwar mashuqa khaDi hai

diya jab ki KHiraj-e-husn hum ne

ye choTi kis liye pichhe paDi hai

saf-e-dandan hai dahan-e-mushkbu mein

ki sanche motiyon ki ye laDi hai

guman hota hai sumbul ki lachak par

kisi dast-e-nigarin mein chhaDi hai

ba-rabt-e-KHas ho tazin-e-KHatir

ye husn-o-ishq ki nazuk kaDi hai

hui aasaish-e-duniya to hasil

magar aage qayamat ki ghaDi hai

na chhuTi dida-e-ushshaq se kyon

ye barkha hai ki aansu ki jhaDi hai

hua naKHchir aaKHir nazr-e-tair

nigah kis auj pe 'nasrin' laDi hai