parindon ka shajar ko chhoD kar jaana zaruri tha

parindoñ kā shajar ko chhoḌ kar jaanā zarūrī thā

ki taa.ir ko ḳhizāñ kā ḳhauf bhī khānā zarūrī thā

kahānī maiñ sunātī roz ik us ko rihā.ī kī

qafas meñ qaid dil ko ḳhvāb dikhlānā zarūrī thā

jo hotī itr maiñ to bas hī jaatī jism meñ tere

maiñ thī tulsī mirā āñgan ko mahkānā zarūrī thā

hazāroñ hasrateñ haiñ ḳhvāhisheñ haiñ qaid jab dil meñ

mujhe pā kar tirā un ko bhī to paanā zarūrī thā

kiyā botal meñ dil ko qaid phir pheñkā samundar meñ

mire siine se dil kā duur ho jaanā zarūrī thā

batā kar duudh jab paanī diyā thā saath roTī ke

yuuñ maañ kā raat phir bachchoñ ko bahlānā zarūrī thā

aziyyat raat khāne meñ parosī muflisī ke saath

'hiyā' kā hausla phir saath meñ khānā zarūrī thā

parindon ka shajar ko chhoD kar jaana zaruri tha

ki tair ko KHizan ka KHauf bhi khana zaruri tha

kahani main sunati roz ek us ko rihai ki

qafas mein qaid dil ko KHwab dikhlana zaruri tha

jo hoti itr main to bas hi jati jism mein tere

main thi tulsi mera aangan ko mahkana zaruri tha

hazaron hasraten hain KHwahishen hain qaid jab dil mein

mujhe pa kar tera un ko bhi to pana zaruri tha

kiya botal mein dil ko qaid phir phenka samundar mein

mere sine se dil ka dur ho jaana zaruri tha

bata kar dudh jab pani diya tha sath roTi ke

yun man ka raat phir bachchon ko bahlana zaruri tha

aziyyat raat khane mein parosi muflisi ke sath

'hiya' ka hausla phir sath mein khana zaruri tha