partaw-e-husn kahin anjuman-afroz to ho

partav-e-husn kahīñ anjuman-afroz to ho

dil-e-pur-dāġh mirā māya-e-sad-soz to ho

kam se kam koī to sāmāñ tire aane kā karūñ

atlas-e-charḳh to ho bistar-e-gul-doz to ho

rañg-e-pairā-e-chaman-josh meñ kaliyāñ chaTkeñ

khol de band-e-naqāb aaj ki nau-roz to ho

dil meñ paivast na ho jo vo nazar hī kyā hai

tiir tarkash meñ agar ho to jigar-doz to ho

na sahī sohbat-e-firdaus jahannam hī sahī

mahfil-e-aish na ho anjuman-e-soz to ho

kyā natīja hai 'azīz' aisī jabīñ-sā.ī se

but kā sajda ho magar nāsiya-afroz to ho

partaw-e-husn kahin anjuman-afroz to ho

dil-e-pur-dagh mera maya-e-sad-soz to ho

kam se kam koi to saman tere aane ka karun

atlas-e-charKH to ho bistar-e-gul-doz to ho

rang-e-paira-e-chaman-josh mein kaliyan chaTken

khol de band-e-naqab aaj ki nau-roz to ho

dil mein paiwast na ho jo wo nazar hi kya hai

tir tarkash mein agar ho to jigar-doz to ho

na sahi sohbat-e-firdaus jahannam hi sahi

mahfil-e-aish na ho anjuman-e-soz to ho

kya natija hai 'aziz' aisi jabin-sai se

but ka sajda ho magar nasiya-afroz to ho