پرتو رخ سے ترے عالم درخشاں ہو گیا

پرتو رخ سے ترے عالم درخشاں ہو گیا

داغ دل تیری بدولت مہر تاباں ہو گیا

آ گیا دل میں تصور اس رخ پر نور کا

مٹ گئیں تاریکیاں گھر میں چراغاں ہو گیا

اس کی رحمت نے مجھے پھر لے لیا آغوش میں

جب خطاؤں پر میں اپنی خود پشیماں ہو گیا

ان کے الطاف و کرم سے دن ہمارے پھر گئے

مشکلیں حل ہو گئیں ہر کام آساں ہو گیا

میں سمجھتا تھا فقط دیر و حرم ہیں اس کے گھر

اپنے دل میں جب اسے پایا تو حیراں ہو گیا

ایک مشت خاک کا اللہ اکبر یہ شرف

بن گیا مختار کل محبوب یزداں ہو گیا

جب نہ پایا اس نے دنیا میں کوئی مجھ سا رفیقؔ

کس قدر نادم ہوا دل میں پشیماں ہو گیا