partaw-e-ruKH se tere aalam daraKHshan ho gaya

partav-e-ruḳh se tire 'ālam daraḳhshāñ ho gayā

dāġh-e-dil terī badaulat mehr-e-tābāñ ho gayā

aa gayā dil meñ tasavvur us ruḳh-e-pur-nūr kā

miT ga.iiñ tārīkiyāñ ghar meñ charāġhāñ ho gayā

us kī rahmat ne mujhe phir le liyā āġhosh meñ

jab ḳhatāoñ par maiñ apnī ḳhud pashemāñ ho gayā

un ke altāf-o-karam se din hamāre phir ga.e

mushkileñ hal ho ga.iiñ har kaam āsāñ ho gayā

maiñ samajhtā thā faqat dair-o-haram haiñ us ke ghar

apne dil meñ jab use paayā to hairāñ ho gayā

ek musht-e-ḳhāk kā allāhu-akbar ye sharaf

ban gayā muḳhtār-e-kul mahbūb-e-yazdāñ ho gayā

jab na paayā us ne duniyā meñ koī mujh sā 'rafīq'

kis qadar nādim huā dil meñ pashemāñ ho gayā

partaw-e-ruKH se tere 'alam daraKHshan ho gaya

dagh-e-dil teri badaulat mehr-e-taban ho gaya

aa gaya dil mein tasawwur us ruKH-e-pur-nur ka

miT gain tarikiyan ghar mein charaghan ho gaya

us ki rahmat ne mujhe phir le liya aaghosh mein

jab KHataon par main apni KHud pasheman ho gaya

un ke altaf-o-karam se din hamare phir gae

mushkilen hal ho gain har kaam aasan ho gaya

main samajhta tha faqat dair-o-haram hain us ke ghar

apne dil mein jab use paya to hairan ho gaya

ek musht-e-KHak ka allahu-akbar ye sharaf

ban gaya muKHtar-e-kul mahbub-e-yazdan ho gaya

jab na paya us ne duniya mein koi mujh sa 'rafiq'

kis qadar nadim hua dil mein pasheman ho gaya