parwana soz-e-shama se yun ba-KHabar na ho

parvāna soz-e-sham.a se yuuñ bā-ḳhabar na ho

dil se lagī na ho to zabāñ meñ asar na ho

kaahe ko yuuñ basī kabhī bastī ḳhayāl kī

duniyā ujaḌ bhī jaa.e to ham ko ḳhabar na ho

uf uf banī hai ek zamāne kī jaan par

ab dil-jaloñ kī aah meñ yā-rab asar na ho

yā uThtī mauj chaltī havā se thī barhamī

yā ab mujhe malāl kisī baat par na ho

ā.īina-e-jamāl-e-jahāñ ko bahut na dekh

Dartā hai dil kahīñ tujhe apnī nazar na ho

nairangī-e-malāl bahut nāgavār hai

duniyā-e-ġham meñ shaam na ho yā sahar na ho

duniyā se uTThe dil kī kahānī bañdhī rahī

yuuñ bhī kisī malāl-zada kī basar na ho

har sū hai ik malāl kī duniyā basī huī

rū-e-ḳhayāl aah kidhar ho kidhar na ho

haañ haañ har ek zarra hai ā.īna-e-jamāl

kyā dekhe tujh ko jis kī tirī sī nazar na ho

parwana soz-e-shama se yun ba-KHabar na ho

dil se lagi na ho to zaban mein asar na ho

kahe ko yun basi kabhi basti KHayal ki

duniya ujaD bhi jae to hum ko KHabar na ho

uf uf bani hai ek zamane ki jaan par

ab dil-jalon ki aah mein ya-rab asar na ho

ya uThti mauj chalti hawa se thi barhami

ya ab mujhe malal kisi baat par na ho

aaiina-e-jamal-e-jahan ko bahut na dekh

Darta hai dil kahin tujhe apni nazar na ho

nairangi-e-malal bahut nagawar hai

duniya-e-gham mein sham na ho ya sahar na ho

duniya se uTThe dil ki kahani bandhi rahi

yun bhi kisi malal-zada ki basar na ho

har su hai ek malal ki duniya basi hui

ru-e-KHayal aah kidhar ho kidhar na ho

han han har ek zarra hai aaina-e-jamal

kya dekhe tujh ko jis ki teri si nazar na ho