parwaz ka tha shauq mujhe aasman tak

parvāz kā thā shauq mujhe āsmān tak

bijlī girī to jal ga.e khetoñ ke dhaan tak

kachche gharoñ ke gaañv meñ barsāt rah ga.ī

pakkī saḌak banī bhī to pakke makān tak

kaise batā.ūñ tum ko olympic meñ kyā huā

merī to apnī dauḌ hai ghar se dukān tak

parvardigār mere gunāhoñ ko baḳhsh de

mujh ko sunā.ī detī nahīñ ab azaan tak

bachche ne ko.elā jo churāyā sazā milī

un kī sunāo bech ga.e jo khadān tak

aayā vo muskurā ke mirā zaḳhm le gayā

ik shaḳhs jis pe maiñ ne diyā thā na dhyān tak

fasloñ kā ḳhvāb bhuuk kī āñkhoñ meñ rah gayā

gaañv ke khet khā ga.e lekin kisān tak

ik laḌkī apne apne aap meñ ghuT ghuT ke mar ga.ī

ghar tak ḳhabar ga.ī na kabhī ḳhāndān tak

is baar bāl-o-par hī na kaaTe ga.e faqat

qaiñchī kutar ga.ī hai mirā āsmān tak

ghar ghar meñ jhāñktī hai yahāñ tīsrī nazar

rahtī hai koī baat kahāñ darmiyān tak

'sāgar' ye faisla bhī koī faisla huā

jis meñ liyā gayā na ho merā bayān tak

parwaz ka tha shauq mujhe aasman tak

bijli giri to jal gae kheton ke dhan tak

kachche gharon ke ganw mein barsat rah gai

pakki saDak bani bhi to pakke makan tak

kaise bataun tum ko olympic mein kya hua

meri to apni dauD hai ghar se dukan tak

parwardigar mere gunahon ko baKHsh de

mujh ko sunai deti nahin ab azan tak

bachche ne koela jo churaya saza mili

un ki sunao bech gae jo khadan tak

aaya wo muskura ke mera zaKHm le gaya

ek shaKHs jis pe main ne diya tha na dhyan tak

faslon ka KHwab bhuk ki aankhon mein rah gaya

ganw ke khet kha gae lekin kisan tak

ek laDki apne apne aap mein ghuT ghuT ke mar gai

ghar tak KHabar gai na kabhi KHandan tak

is bar baal-o-par hi na kaTe gae faqat

qainchi kutar gai hai mera aasman tak

ghar ghar mein jhankti hai yahan tisri nazar

rahti hai koi baat kahan darmiyan tak

'sagar' ye faisla bhi koi faisla hua

jis mein liya gaya na ho mera bayan tak