pas-e-diwar bhi diwar uThae hue hain

pas-e-dīvār bhī dīvār uThā.e hue haiñ

mere sāthī mire lāshe ko chhupā.e hue haiñ

kis se pūchhūñ ki mire naam kī taḳhtī hai kahāñ

mere siine meñ to vīrāne samā.e hue haiñ

un se kah do jo makīñ haiñ mire ghar meñ ki mujhe

log phir bechne bāzār meñ laa.e hue haiñ

zulmateñ un kā ijāra haiñ chalo yuuñ hī sahī

ham bhī lau dil ke charāġhoñ kī baḌhā.e hue haiñ

āsmāñ par na sitāre na zamīñ par jugnū

kaun phir māthoñ pe kirneñ sī sajā.e hue haiñ

ham to patjhaḌ kī sadā haiñ hameñ dekho na suno

ham ko socho ki bahāroñ ko sajā.e hue haiñ

ret par maiñ bhī gharauñdā liye baiThā huuñ 'matīn'

vo bhī har qatra-e-bārish meñ samā.e hue haiñ

pas-e-diwar bhi diwar uThae hue hain

mere sathi mere lashe ko chhupae hue hain

kis se puchhun ki mere nam ki taKHti hai kahan

mere sine mein to virane samae hue hain

un se kah do jo makin hain mere ghar mein ki mujhe

log phir bechne bazar mein lae hue hain

zulmaten un ka ijara hain chalo yun hi sahi

hum bhi lau dil ke charaghon ki baDhae hue hain

aasman par na sitare na zamin par jugnu

kaun phir mathon pe kirnen si sajae hue hain

hum to patjhaD ki sada hain hamein dekho na suno

hum ko socho ki bahaaron ko sajae hue hain

ret par main bhi gharaunda liye baiTha hun 'matin'

wo bhi har qatra-e-barish mein samae hue hain