pas-e-diwar zindan zindagi maujud rahti hai

pas-e-dīvār zindāñ zindagī maujūd rahtī hai

añdherī raat meñ bhī raushnī maujūd rahtī hai

sar-e-darbār-o-maqtal ek sā mausam anā kā hai

garāñ sar meñ hamesha sar-kashī maujūd rahtī hai

ravāñ rakhte haiñ ham ko dasht-e-dariyā dhuup darvāze

sarāboñ se safar meñ tishnagī maujūd rahtī hai

nazar se joḌ rakhtā hai ye dil aise bhī nazzāre

ki ba.ad-az-marg bhī hairāngī maujūd rahtī hai

bahut āsān rāheñ bhī bahut āsāñ nahīñ hotīñ

sabhī rastoñ meñ thoḌī gumrahī maujūd rahtī hai

mirī sochoñ meñ yuuñ rach bas ga.e haiñ shabnamī mausam

tavātur se tah-e-mizhgāñ namī maujūd rahtī hai

talātum meñ sadā rahtī haiñ kirneñ husn-e-tābāñ kī

nasīb-e-dushmanāñ kuchh barhamī maujūd rahtī hai

nikal paatā nahīñ maiñ kūcha-e-be-nām se 'azmī'

ki asbāb-e-safar meñ kuchh kamī maujūd rahtī hai

pas-e-diwar zindan zindagi maujud rahti hai

andheri raat mein bhi raushni maujud rahti hai

sar-e-darbar-o-maqtal ek sa mausam ana ka hai

garan sar mein hamesha sar-kashi maujud rahti hai

rawan rakhte hain hum ko dasht-e-dariya dhup darwaze

sarabon se safar mein tishnagi maujud rahti hai

nazar se joD rakhta hai ye dil aise bhi nazzare

ki baad-az-marg bhi hairangi maujud rahti hai

bahut aasan rahen bhi bahut aasan nahin hotin

sabhi raston mein thoDi gumrahi maujud rahti hai

meri sochon mein yun rach bas gae hain shabnami mausam

tawatur se tah-e-mizhgan nami maujud rahti hai

talatum mein sada rahti hain kirnen husn-e-taban ki

nasib-e-dushmanan kuchh barhami maujud rahti hai

nikal pata nahin main kucha-e-be-nam se 'azmi'

ki asbab-e-safar mein kuchh kami maujud rahti hai