pas-e-ghubar-e-talab KHauf-e-justuju hai bahut

pas-e-ġhubār-e-talab ḳhauf-e-justujū hai bahut

rafīq-e-rāh magar un kī aarzū hai bahut

laraz ke TuuT hī jaa.e na aaj barg-e-badan

lahū meñ qurb kī garmī ragoñ meñ lū hai bahut

ulajh gayā hai vo ḳhvāhish ke jaal meñ ya.anī

fareb-e-rañg-e-havas ab ke dū-ba-dū hai bahut

kaTā-phaTā sahī malbūs-e-kohnagī na utaar

tire liye yahī dīvār-e-ābrū hai bahut

mizāj-e-vaqt kī tasvīr ban ga.e ham log

laboñ pe barf jamī hai diloñ meñ lū hai bahut

harā-bharā nazar aatā hai yuuñ to vo 'aḳhtar'

dayār-e-dil meñ magar qaht-e-rañg-o-bū hai bahut

pas-e-ghubar-e-talab KHauf-e-justuju hai bahut

rafiq-e-rah magar un ki aarzu hai bahut

laraz ke TuT hi jae na aaj barg-e-badan

lahu mein qurb ki garmi ragon mein lu hai bahut

ulajh gaya hai wo KHwahish ke jal mein yani

fareb-e-rang-e-hawas ab ke du-ba-du hai bahut

kaTa-phaTa sahi malbus-e-kohnagi na utar

tere liye yahi diwar-e-abru hai bahut

mizaj-e-waqt ki taswir ban gae hum log

labon pe barf jami hai dilon mein lu hai bahut

hara-bhara nazar aata hai yun to wo 'aKHtar'

dayar-e-dil mein magar qaht-e-rang-o-bu hai bahut