pas-e-marg-e-tamanna kaun dekhe

pas-e-marg-e-tamannā kaun dekhe

mire naqsh-e-kaf-e-pā kaun dekhe

koī dekhe mirī āñkhoñ meñ aa kar

magar dariyā meñ sahrā kaun dekhe

ab is dasht-e-talab meñ kaun aa.e

sarāboñ kā tamāsha kaun dekhe

agarche dāman-e-dil hai darīda

darūn-e-naḳhl-e-tāza kaun dekhe

bahut marbūt rahtā huuñ maiñ sab se

mirī be-rabt duniyā kaun dekhe

shumār-e-ashk-e-sham-e-bazm mumkin

hamārā dil pighaltā kaun dekhe

maiñ kyā dekhūñ ki tum aa.e ho milne

khulī āñkhoñ se sapnā kaun dekhe

maiñ jaisā huuñ maiñ vaisā to nahīñ huuñ

magar jaisā huuñ vaisā kaun dekhe

pas-e-marg-e-tamanna kaun dekhe

mere naqsh-e-kaf-e-pa kaun dekhe

koi dekhe meri aankhon mein aa kar

magar dariya mein sahra kaun dekhe

ab is dasht-e-talab mein kaun aae

sarabon ka tamasha kaun dekhe

agarche daman-e-dil hai darida

darun-e-naKHl-e-taza kaun dekhe

bahut marbut rahta hun main sab se

meri be-rabt duniya kaun dekhe

shumar-e-ashk-e-sham-e-bazm mumkin

hamara dil pighalta kaun dekhe

main kya dekhun ki tum aae ho milne

khuli aankhon se sapna kaun dekhe

main jaisa hun main waisa to nahin hun

magar jaisa hun waisa kaun dekhe