pas-e-yaqin kahin hum bhi tere guman mein hain

pas-e-yaqīñ kahīñ ham bhī tire gumān meñ haiñ

tirā nishāñ haiñ ye taare jo āsmān meñ haiñ

haram-sarā thā tirā dil so chhoḌ aa.e use

vagarna kahne ko ab bhī usī makān meñ haiñ

mire nasīb ke ḳhush-rañg ḳhvāb aur sarāb

na is jahān meñ the aur na us jahān meñ haiñ

maiñ apne vāste in meñ se ḳhud hī chun lūñgī

vo sānehe jo mayassar tirī dukān meñ haiñ

sarāb haiñ ye tumhāre sab ā.ina-ḳhāne

basārteñ bhī na-jāne kis imtihān meñ haiñ

kabhī vo ā.ina-e-chashm meñ sañvarte the

vo saare ḳhvāb nisāboñ ke jo bayān meñ haiñ

na-jāne lā.eñge dil par tabāhiyāñ kyā kyā

vo hādse jo abhī tak tirī kamān meñ haiñ

ye pul-sirāt kahāñ le chalā hameñ 'anjum'

na ham zamīñ ke rahe aur na āsmān meñ haiñ

pas-e-yaqin kahin hum bhi tere guman mein hain

tera nishan hain ye tare jo aasman mein hain

haram-sara tha tera dil so chhoD aae use

wagarna kahne ko ab bhi usi makan mein hain

mere nasib ke KHush-rang KHwab aur sarab

na is jahan mein the aur na us jahan mein hain

main apne waste in mein se KHud hi chun lungi

wo sanehe jo mayassar teri dukan mein hain

sarab hain ye tumhaare sab aaina-KHane

basarten bhi na-jaane kis imtihan mein hain

kabhi wo aaina-e-chashm mein sanwarte the

wo sare KHwab nisabon ke jo bayan mein hain

na-jaane laenge dil par tabahiyan kya kya

wo hadse jo abhi tak teri kaman mein hain

ye pul-siraat kahan le chala hamein 'anjum'

na hum zamin ke rahe aur na aasman mein hain