pas-manzar-e-sukun mein bhi ek be-kali mili

pas-manzar-e-sukūñ meñ bhī ik be-kalī milī

chehroñ ke izhdihām meñ be-chehragī milī

zehnoñ meñ ab bhī ghar kī ghuTan kā ḳhayāl hai

ġhurbat meñ sirf jism ko āsūdgī milī

āñkhoñ ke mai-kadoñ se tamanna ke shahr tak

har-gām ik sarāb milā tishnagī milī

sūraj se hai ḳhirāj kī tālib sipāh-e-shām

kyā phir yazīd-e-shab ko kahīñ sarvarī milī

ye to huā ki zulm ko mohlat milī magar

taqdīs-e-fikr-o-zehn ko paiġhambarī milī

daulat ke eqtidār kā parcham nigūñ huā

mehnat ke e.atibār ko tesha-garī milī

kuchh log to sarāb se bhī pā ga.e murād

ham ko samundaroñ se bhī tishna-labī milī

pas-manzar-e-sukun mein bhi ek be-kali mili

chehron ke izhdiham mein be-chehragi mili

zehnon mein ab bhi ghar ki ghuTan ka KHayal hai

ghurbat mein sirf jism ko aasudgi mili

aankhon ke mai-kadon se tamanna ke shahr tak

har-gam ek sarab mila tishnagi mili

suraj se hai KHiraj ki talib sipah-e-sham

kya phir yazid-e-shab ko kahin sarwari mili

ye to hua ki zulm ko mohlat mili magar

taqdis-e-fikr-o-zehn ko paighambari mili

daulat ke eqtidar ka parcham nigun hua

mehnat ke eatibar ko tesha-gari mili

kuchh log to sarab se bhi pa gae murad

hum ko samundaron se bhi tishna-labi mili