پسند خاطر جاناں ہے انکسار مرا

پسند خاطر جاناں ہے انکسار مرا

اسی لئے تو مہ و مہر ہیں غبار مرا

ملی ہے مجھ کو ازل سے کمند یزداں گیر

شکار ہر کس و ناکس نہیں شکار مرا

علی الصباح مجھے بھر کے جام نجم سحر

مدام دیتا ہے ساقیٔ نامدار مرا

مثال لالہ محبت کے داغ ہوتے ہوئے

نہیں ہے دامن دل دیکھ داغدار مرا

مزا ہے وصل میں اور لطف ہجر یار میں ہے

وہ پھل کا وقت یہ ہے موسم بہار مرا

نوائے نور ہو جب میرے لب پہ اہل چمن

تو احترام کرے کیوں نہ شاخسار مرا

پرکھ سکے جو مجھے وہ نگاہ پاک کہاں

جدا امیںؔ ہے زر و سیم سے عیار مرا