pasand na-pasand ka koi bhi zabta nahin

pasand nā-pasand kā koī bhī zābta nahīñ

kabhī bhalā bhī hai burā kabhī burā burā nahīñ

to jaise dhuup meñ chamaktā barf-posh kohsār

maiñ kaalī raat kā diyā tū mere husn sā nahīñ

vo hañstā bastā shaḳhs thā diloñ pe sab ke naqsh thā

phir ek din kahīñ gayā kahāñ gayā patā nahīñ

ye kyā hasīn baaġh hai yahāñ haiñ kitnī titliyāñ

vo ek kyoñ nahīñ yahāñ nahīñ yahāñ maza nahīñ

tamām raat jaag kar kaTī hai us ke vāste

mirī sahar nahīñ huī vo mehr to dikhā nahīñ

ye kyā ajiib ishq hai jo phone par hī ho gayā

qarābatoñ kā shauq hī diloñ meñ ab rahā nahīñ

ye bazm-e-shab sajā rahe haiñ rañg rañg qumqume

magar ye kaisī bazm hai ki ik bhī dil jalā nahīñ

sunā hai mere baare meñ chhapī haiñ aaj surḳhiyāñ

ye rā.egāñ chhapī haiñ un laboñ ne gar paḌhā nahīñ

pasand na-pasand ka koi bhi zabta nahin

kabhi bhala bhi hai bura kabhi bura bura nahin

to jaise dhup mein chamakta barf-posh kohsar

main kali raat ka diya tu mere husn sa nahin

wo hansta basta shaKHs tha dilon pe sab ke naqsh tha

phir ek din kahin gaya kahan gaya pata nahin

ye kya hasin bagh hai yahan hain kitni titliyan

wo ek kyon nahin yahan nahin yahan maza nahin

tamam raat jag kar kaTi hai us ke waste

meri sahar nahin hui wo mehr to dikha nahin

ye kya ajib ishq hai jo phone par hi ho gaya

qarabaton ka shauq hi dilon mein ab raha nahin

ye bazm-e-shab saja rahe hain rang rang qumqume

magar ye kaisi bazm hai ki ek bhi dil jala nahin

suna hai mere bare mein chhapi hain aaj surKHiyan

ye raegan chhapi hain un labon ne gar paDha nahin