pasti se bulandi par khincha hai sitaron ne

pastī se bulandī par khīñchā hai sitāroñ ne

sadiyoñ ke tajassus ne qarnoñ ke ishāroñ ne

ġharqābī-e-ādam kī tārīḳh murattab kī

vīrān jazīroñ ne sunsān kināroñ ne

tārīḳh ke chehre par jo zaḳhm nazar aa.e

kuchh aur kiyā gahrā in vaqt ke dhāroñ ne

har daur meñ kiiñ paidā āzādī kī tamsīleñ

zanjīr ke halqoñ ne zindāñ kī darāroñ ne

kiiñ azm-e-tavānā kī dil khol ke tārīfeñ

patthar kī fasīloñ ne faulād ke aaroñ ne

shab-ḳhūn-o-siyah-kārī bad-chalanī-o-ayyārī

sūraj ne nahīñ dekhī dekhī hai sitāroñ ne

ik kaif sā taarī hai khultī hī nahīñ āñkheñ

kuchh aisī pilā dī hai nau-ḳhez bahāroñ ne

kyā mil ke piyeñ aur kyā sar joḌ ke ham baiTheñ

naqsha hī badal Daalā saaqī ke ishāroñ ne

un zaḳhmoñ se ristā hai ai 'mehr' lahū ab tak

khaa.e the kabhī patthar jo baḳht ke māroñ ne

pasti se bulandi par khincha hai sitaron ne

sadiyon ke tajassus ne qarnon ke ishaaron ne

gharqabi-e-adam ki tariKH murattab ki

viran jaziron ne sunsan kinaron ne

tariKH ke chehre par jo zaKHm nazar aae

kuchh aur kiya gahra in waqt ke dhaaron ne

har daur mein kin paida aazadi ki tamsilen

zanjir ke halqon ne zindan ki dararon ne

kin azm-e-tawana ki dil khol ke tarifen

patthar ki fasilon ne faulad ke aaron ne

shab-KHun-o-siyah-kari bad-chalani-o-ayyari

suraj ne nahin dekhi dekhi hai sitaron ne

ek kaif sa tari hai khulti hi nahin aankhen

kuchh aisi pila di hai nau-KHez bahaaron ne

kya mil ke piyen aur kya sar joD ke hum baiThen

naqsha hi badal Dala saqi ke ishaaron ne

un zaKHmon se rista hai ai 'mehr' lahu ab tak

khae the kabhi patthar jo baKHt ke maron ne